ىشكى ىستەر مينيسترلىگى اقتوبەدەگى اتىستىڭ قالاي وربىگەندىگىن رەسمي جاريا ەتتى

استانا. قازاقپارات - ق ر ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ اقتوبەدەگى اتىستىڭ قالاي وربىگەندىگىن رەسمي جاريا ەتتى.

 ونىڭ اتاپ وتۋىنشە، 5 - ماۋسىم كۇنى جەرگىلىكتى ۋاقىت بويىنشا ساعات 14.28-دە تەرىس اعىمداعى ءدىن ۇستانۋشىلار قارۋ- جاراق يەمدەنۋ ماقساتىمەن «پاللادا» دۇكەنىنە شابۋىل جاساعان.

 دابىل كنوپكاسىن باسىپ ۇلگەرگەن دۇكەن ساتۋشىسىن قىلمىسكەرلەر پىشاقتاپ ولتىرگەن. وقيعا ورنىنا ەڭ ءبىرىنشى بولىپ «جەدەل كۇزەت» ج ش س جەكە كۇزەت ۇيىمىنىڭ 2 قىزمەتكەرى كەلىپ، ونىڭ ءبىرى بىردەن وققا ۇشىپ مەرت بولسا، ەكىنشىسى جاراقاتتانعان. وسىدان كەيىن پوليتسيا قىزمەتكەرلەرى دە كەلىپ، قىلمىسكەرلەر ولارعا قارۋلى قارسىلىق تانىتقان. اتىس بارىسىندا 3 پوليتسيا قىزمەتكەرى جارالانىپ، ال قىلمىسكەرلەرى پاترۋلدىك ماشينامەن بوي تاسالاعان. ولار دۇكەننەن 17 مىلتىق، 3 گاز تاپانشاسىن، وقتار مەن پىشاقتار الىپ كەتكەن. ۇرلانعان قارۋ- جاراق پەن وق- دارىلەردىڭ سانىن ناقتىلانۋدا، دۇكەندە تۇگەندەۋ جۇرگىزىلۋدە.

«پاللادا» دۇكەنىنە شابۋىل جاساعاننان كەيىن قارۋلى قىلمىسكەرلەر ەكى توپقا بولىنگەن.

 6 قىلمىسكەردەن جاساقتالعان ءبىرىنشى توپ «پانتەرا» قارۋ- جاراق دۇكەنىنە شابۋىلداپ، وندا ءبىر ادامدى پىشاقتاپ ولتىرسە، ەكىنشىسىن جاراقاتتاعان. وقيعا ورنىنا جەتكەن پوليتسيا قىزمەتكەرلەرى 3 قىلمىسكەردى اتىپ ولتىردى، بىرەۋىن جاراقاتتادى. ال ەكەۋى بوي تاسالاپ ۇلگەرگەن. دەگەنمەن، ولار ءسال كەيىنىرەك قالا سىرتىنان تابىلىپ، كوزدەرى جويىلدى.

ەكىنشى توپ اۆتوبۋستى باسىپ الىپ، وندا جولاۋشىلاردى ءتۇسىرىپ جىبەرگەن. وسىدان كەيىن ۇلتتىق گۆارديانىڭ 6655 اسكەري ءبولىمى اۋماعىنا كىرە بەرىس قاقپانى اۆتوبۋسپەن بۇزىپ كىرگەن جانە اسكەري قىزمەتشىلەرمەن، وقيعا ورنىنا جەتكەن پوليتسيامەن اتىسقان.

قارۋلى قارسىلىققا تاپ بولعان قىلمىسكەرلەردىڭ ءبىر توبى توسقاۋىلعا ءتۇسىپ قالسا، ەكىنشى توبى قاشىپ كەتكەن. اتىس بارىسىندا 1 قىلمىسكەر ءولىپ، تاعى ءبىر جاراقاتتانعان. ال ۇلتتىق گۆارديانىڭ 3 اسكەري قىزمەتشىسى قازا تاۋىپ، 6-اۋى جارالانعان.

«پاللادا» دۇكەنى ماڭىندا قىلمىسكەرلەردى ىزدەۋ شارالارى بارىسىندا كۇدىكتى 5 ادام ۇستالىپ، پوليتسيا بولىمشەسىنە جەتكىزىلدى.

ءتۇن ىشىندە جۇرگىزىلگەن جەدەل ىزدەۋ شاراسى كەزىندە پوليتسيا قىزمەتكەرلەرىنە قارۋلى قارسىلىق كورسەتكەن تاعى 5 قىلمىسكەر وققا ۇشىپ، 2-ەۋى ۇستالدى.

قىلمىسكەرلەردەن ۇرلانعان قارۋ- جاراقتىڭ باسىم بولىگى الىندى.

بۇل قىلمىسقا قاتىسى بار بارلىق قىلمىسكەرلەردىڭ اتى- جوندەرى انىقتالىپ، ولاردى ۇستاۋ شارالارى قابىلدانۋدا.

قازىرگى ۋاقىتتا اقتوبە وبلىسىندا لاڭكەستىككە قارسى وپەراتسيا رەجىمى ەنگىزىلگەن. ەلىمىزدىڭ ىشكى ىستەر ورگاندارىنىڭ بارلىق جەكە قۇرامى كۇشەيتىلگەن قىزمەتكە كوشىرىلدى.

اقتوبە قالاسىنداعى احۋال تۇراقتى. كاسىپورىندار مەن قوعامدىق كولىكتەر تۇراقتى رەجىمدە جۇمىس ىستەۋدە.

 اۆتور: مارلان جيەمباي