اقتوبەدە لاڭكەستىك قاۋىپتىڭ قىزىل دەڭگەيى جاريالاندى

استانا. قازاقپارات - اقتوبەدە لاڭكەستىك قاۋىپتىڭ قىزىل دەڭگەيى جاريالاندى. مۇنداي حابارلاما كەشە كەشكىسىن قالالىقتاردىڭ ۇيالى تەلەفوندارىنا ءتۇستى.

قالاعا كىرە بەرىس جولداردا ارنايى توسقاۋىلدار قويىلىپ، كەشەگى اتىسقا قاتىسى بارلاردى ىزدەۋ جالعاسۋدا.

ءىرى دۇكەندەر مەن ساۋدا ۇيلەرى جابىلىپ، قالادا ينتەرنەت اجىراتىلعان. بۇگىن ۇلتتىق ءبىرىڭعاي تەستىلەۋ 7 - ماۋسىمعا اۋىستىرىلدى.

بۇعان دەيىن حابارلاعانىمىزداي، اقتوبە وبلىسىنىڭ اكىمى بەردىبەك ساپاربايەۆ وڭىردە قالىپتاسقان جاعدايعا بايلانىستى مالىمدەمە جاسادى. ايماق باسشىسى حالىقتى ساق بولىپ، كۇدىك تۋعىزاتىن ازاماتتاردى كورگەندە ىشكى ىستەر ورگاندارىنا حابارلاۋعا شاقىردى.

«اقتوبەلىكتەردىڭ ساقتىق تانىتۋلارىن سۇرايمىز. كۇماندى تۇلعالاردى بايقاساڭىز، 102 ءنومىر ارقىلى ىشكى ىستەر ورگاندارىنا شۇعىل تۇردە حابارلاۋ قاجەت. قۇرمەتتى جەرلەستەر، سىزدەردەن سابىرلىق تانىتۋدى سۇرايمىز. جوسپارلى انتيتەررورلىق وپەراتسيالار جۇرگىزىلۋدە. جاعدايدىڭ باقىلاۋدا ەكەندىگىنە سەندىرەمىز. قازىرگى كەزدە احۋال تۇراقتى»، - دەدى بەردىبەك ساپاربايەۆ.

سوڭعى دەرەكتەر بويىنشا، اقتوبەدە انتي تەررورلىق وپەراتسيا كەزىندە 4 سودىردىڭ كوزى جويىلىپ، 7-ەۋى قولعا ءتۇستى. ونىڭ ەكەۋى جارالانعان. قازىرگى كەزدە قالعان قىلمىسكەرلەردى تابۋ ءۇشىن بارلىق امالدار جاسالىپ جاتىر.

الدىن الا بولجام بويىنشا، شابۋىلدى تەرىس اعىمداعى ءدىن ۇستانۋشىلار جاساعان. اقتوبە قالاسىندا انتيتەررورلىق وپەراتسيا رەجىمى جاريالاندى. ويىن- ساۋىق مەكەمەلەرىنىڭ جۇمىسى مەن قوعامدىق كولىك قاتىناسى توقتاتىلدى.

 ەسكە سالا كەتەيىك، 5 - ماۋسىم كۇنى استانا ۋاقىتى بويىنشا 15:45-تە اقتوبەدەگى «پاللادا» قارۋ- جاراق دۇكەنىنە بەلگىسىز بىرەۋلەر شابۋىل جاساپ، دۇكەننىڭ ساتۋشىسىن جانە «جەدەل كۇزەت» كۇزەت اگەنتتىگىنىڭ قىزمەتكەرىن ولتىرگەن. بۇدان بولەك وقيعا ورنىنا كەلىپ جەتكەن ءۇش پوليسەيگە وق اتىپ، جاراقاتتاعان. سونداي- اق، «پانتەرا» اتتى قارۋ- جاراق دۇكەنىنە شابۋىل جاساپ، كەلۋشىلەردىڭ ءبىرىن ءولتىرىپ، ەكىنشىسىن جارالاعان. بۇل جەرگە كەلىپ جەتكەن پوليتسيا ناريادىمەن ارادا اتىس بولىپ، ءۇش قىلمىسكەردىڭ كوزى جويىلدى، بىرەۋى قولعا ءتۇستى.

ۇلتتىق ۇلان اسكەري بولىمىنە شابۋىل جاساۋ ءۇشىن سودىرلار باعدارلىق اۆتوبۋستى جۇرگىزۋشى مەن جولاۋشىلاردى شىعارىپ جىبەرىپ، باسىپ العان. كەيىن اۆتوبۋسپەن اسكەري ءبولىم داربازاسىن سوعىپ كىرىپ، كوزگە كورىنگەن ادامدى اتا باستاعان. سولايشا ءۇش اسكەري قىزمەتكەردى ءولتىرىپ، التاۋىن جارالاعان. كەزەكشى قاراۋىل قارۋ قولدانىپ، قىلمىسكەرلەردىڭ بەتىن قايتارعان. وقيعا ورنىنا جەتكەن پوليتسيا ناريادىمەن بىرلەسە وتىرىپ ءبىر سودىردى ءولتىرىپ، ەكىنشىسىن جارالاعان جانە قولعا تۇسىرگەن.

 اۆتور: مارلان جيەمباي