اقتوبەدە شابۋىل جاساۋشىلاردىڭ ۇشەۋىنىڭ كوزى جويىلىپ، بىرەۋى قولعا ءتۇستى - ق ر ءى ءى م

استانا. قازاقپارات - اقتوبەدە انتي تەررورلىق وپەراتسيا رەجىمى جاريالاندى.

 بۇل تۋرالى ق ر ءى ءى م مەملەكەتتىك ءتىل جانە اقپارات دەپارتامەنتىنىڭ باسشىسى الماس سادۋبايەۆ حابارلادى.

«بۇگىن استانا ۋاقىتى بويىنشا 15:45-تە اقتوبە وبلىسىنىڭ ىشكى ىستەر دەپارتامەنتىنە بەلگىسىز بىرەۋلەردىڭ «پاللادا» قارۋ-جاراق دۇكەنىنە شابۋىل جاساعانى تۋرالى حابارلاما كەلىپ ءتۇستى. 16:45-تە تاعى ءبىر قارۋ-جاراق دۇكەنىنە جانە ۇلتتىق ۇلان اسكەري بولىمىنە شابۋىل جاسالعانى حابارلاندى. وقيعا سالدارىنان «پاللادا» دۇكەنىنىڭ ساتۋشىسى قازا تاپتى، ءبىر ادام جارالاندى. شابۋىلدى تويتارۋ كەزىندە ءبىر وفيسەر جانە ءبىر اسكەري قىزمەتكەر اجال قۇشتى، 9 اسكەري قىزمەتكەر جاراقات الدى. ال شابۋىل جاساۋشىلاردىڭ تاراپىنان 1 ادام تۇتقىندالدى، ۇشەۋىنىڭ كوزى جويىلدى، تاعى بىرەۋى جارالاندى. بىرنەشە قىلمىسكەر ءىز جاسىرىپ ۇلگەردى. ولاردى ۇستاۋعا باعىتتالعان جۇمىستار جۇرگىزىلىپ جاتىر.

الدىن الا بولجام بويىنشا، شابۋىلدى تەرىس اعىمداعى ءدىن ۇستانۋشىلار جاساعان. اقتوبە قالاسىندا انتيتەررورلىق وپەراتسيا رەجىمى جاريالاندى. ويىن-ساۋىق مەكەمەلەرىنىڭ جۇمىسى مەن قوعامدىق كولىك قاتىناسى توقتاتىلدى. تۇرعىندار كوشەگە شىقپاۋى جانە وتە ساق بولۋى كەرەك. قوسىمشا اقپاراتتار تاراتىلادى»، - دەدى الماس سادۋبايەۆ