الەكسەي ني: قىتايلارمەن ريودا ەسەپ ايىرىساتىن بولامىز

استانا. قازاقپارات - اۋىر اتلەتيكادان قازاقستان ۇلتتىق قۇراماسىنىڭ باس باپكەرى الەكسەي ني دوپينگ داۋىنا قاتىستى تۋىنداعان ساۋالدارعا جاۋاپ بەردى.

بۇل تۋرالى today.kz حابارلايدى.

«مەن مۇنى جەل ءسوز دەپ بىلەمىن. قىتايلارمەن ريودا ەسەپ ايىرىساتىن بولامىز. ءبىز چينشانلودان باسقا دا توسىن سىيلاردى دايىنداپ وتىرمىز. قىتايلىقتارعا جەتكىزىڭىزدەر، ءبىز كۇرەسۋگە دايىنبىز. بارلىعىن ريو، الاڭ كورسەتەدى. لاس جولمەن ەمەس، ناعىز شايقاستا مىقتىلىقتارىن كورسەتسىن»، - دەدى ني.

ول اۋىر اتلەتيكادا اقپاراتتىق سوعىس كەڭ ەتەك العانىن اتاپ ءوتتى. نيدىڭ سوزىنشە، مۇنداي اڭگىمە پاريجدەگى الەم چەمپيوناتىنان سوڭ دا بولعان. باپكەر زۋلفيا چينشانلونىڭ توپ جارىپ شىعاتىندىعىنا سەنىمدى.

«سپورتشىلار جاتتىعۋعا، زىلتەمىردى كوتەرۋگە عانا ەمەس، ينتەرنەتتەگى شابۋىلدارعا دا توتەپ بەرۋگە قاۋقارلى ادامدار. چينشانلو لوندونعا دايىندالىپ جاتقاندا (وليمپياداعا دەيىن ول ازيا ويىندارى مەن ەكى الەم چەمپيوناتىندا بيىكتەن كورىنگەن) ينتەرنەت ارقىلى قىتاي جۋرناليستەرى شابۋىل جاسادى. ول شابۋىل پاريجدە التىن العان سوڭ ءتىپتى ءورشىپ كەتتى. اقىرى ولاردى ودان سايىن تاڭقالدىرىپ لوندون وليمپياداسىندا الەم رەكوردىن ورناتتى»، - دەدى باس باپكەر.

الەكسەي ني ينتەرنەتتەگى چينشانلوعا قاتىستى دوپينگ داۋىنا سەنبەيدى. ول بۇل اقپارات ءارى قىتاي ينتەرنەتى ارقىلى تاراپ جاتسا، وندا بۇل تۇسىنىكتى نارسە دەيدى.

«ءبىزدىڭ قىتايمەن «دوستىعىمىز» لوندوننان سوڭ بۇزىلدى. ولار سول كەزدە ءبىلىپتى قىزدارىنىڭ بىزگە كەتىپ قالعانىن. ال 2007 -جىلى سول قىزدار ءبىزدىڭ ەلگە كەلگەندە ىزدەۋ سالسا قايدا قالدى. نەگە 5 جىلدان سوڭ ءبىر-اق ەستەرىنە تۇسكەن»، - دەدى ۇلتتىق قۇرامانىڭ باس باپكەرى.

ەسكە سالا كەتسەك، چينشانلونىڭ وليمپيادا التىنىنان ايىرىلۋى مۇمكىن ەكەنى تۋرالى قىتايلىق China Post باسىلىمى حابارلاعان ەدى. مۇنداي داۋ يليا يلينگە قاتىستى دا ءوربىدى. ازىرگە سپورتشىلارعا تاعىلعان ايىپقا قاتىستى ەشقانداي رەسمي مالىمدەمە جاسالعان جوق. ال زۋلفيا چينشانلو تالدىقورعاندا ءوتىپ جاتقان اۋىر اتلەتيكادان ەل چەمپيوناتىنىڭ التىن جۇلدەسىن يەلەندى.