كوكشەتاۋدا جەمىس ءدامى بار بالمۇزداق ءوندىرىسى قولعا الىندى
ءبىر قىزىعى، كاسىپورىننىڭ ءداستۇرلى بالمۇزداعى 52 جىلدان بەرى ءوز قۇرامىن وزگەرتپەگەن ەكەن. تۇتىنۋشىلاردىڭ كوڭىلىنەن شىققان ءسۇت زاۋىتى كەلەشەكتە ىرىمشىكتىڭ الۋان ءتۇرىن ءوندىرىپ، رەسەي نارىعىنا شىعۋدى كوزدەپ وتىر.
نينا فەدوسەيەۆا بۇل زاۋىتتا جارتى عاسىردان بەرى ەڭبەك ەتەدى. ءبىلىم مەن تاجىريبەنى دە وسى جەردە ءجۇرىپ جيناقتادى. ءسۇت وڭدەۋ ءىسىنىڭ شەبەرى سان جىلدار بويى ءدامى وزگەرمەگەن بالمۇزداق ازىرلەۋدىڭ سىرىن جەتىك مەڭگەرگەن.
«بالمۇزداقتى ەسكى ادىسپەن جاسايمىز. ونى ەشقاشان وزگەرتۋگە تىرىسقان دا ەمەسپىز. ءدامى تۋرا ءبىزدىڭ بالالىق شاعىمىزداعى تاتتىگە ۇقسايدى. زاۋىتتا تاۋلىگىنە 7 توننا بالمۇزداق شىعارىلادى»، - دەدى زاۋىت تەحنولوگى نينا فەدوسەيەۆا.
زاۋىتتىڭ تابيعي ونىمدەرى مەن داستۇرگە ادالدىعىن تۇتىنۋشىلار جوعارى باعالايدى. بۇكىل ەلگە تارايتىن كىلەگەيلى پلومبير، شوكولادتى بالمۇزداق دۇكەندە ۇزاق تۇرعان ەمەس. ءسۇت وڭدەۋ زاۋىتى ەندى قاراقات، قۇلپىناي مەن كيۆي ءدامى بار جەمىستى بالمۇزداقتار شىعارۋدى قولعا الدى. سەحتاعى قوندىرعىلار دا جاڭا وندىرىسكە ساي جاڭالاندى.
«مەملەكەت قولداۋىمەن بيىل 25 ميلليون تەڭگە ينۆەستيتسيا تارتىلدى. سونىڭ ارقاسىندا ءوندىرىستى ۇلعايتىپ، جەمىستى بالمۇزداقتىڭ تاعى 6 ءتۇرىن شىعارماقپىز. يتالياندىق دجەلاتو بالمۇزداعىن دا ءوزىمىزدىڭ تاسىلمەن وندىرمەكپىز. سونىمەن قاتار چەچيل، ەرىتىلگەن جانە قاتتى ىرىمشىكتەردىڭ دە ءوندىرىسىن قولعا الامىز»، - دەيدى ءسۇت زاۋىتىنىڭ ديرەكتورى اسەن جاقسىلىقوۆ.
زاۋىتتا ءسۇت ونىمدەرىنىڭ 30 دان استام ءتۇرى شىعارىلادى. كوكشەتاۋدىڭ قۇرتىنا رەسەيلىكتەر قىزىعۋشىلىق تانىتىپ وتىر ەكەن. ەكى ءجۇز ادام ەڭبەك ەتەتىن كاسىپورىننىڭ ءوندىرىس كولەمىن ۇلعايتىپ، جاڭا جۇمىس ورىندارىن اشۋ جوسپاردا بار.
