08:35, 05 - ماۋسىم 2016 | GMT +6
اكىمدىككە ءسوزى وتپەگەن ەكى اياعى سال قاريا ءوز قولىمەن جيەكتاستى شاعىپ، مۇگەدەكاربا وتەتىن جول اشىپ الدى - كەسكىن
استانا. قازاقپارات - رەسەيدىڭ كراسنويارسك قالاسىندا ەكى اياعىنان سال بولىپ قالعان زەينەتكەر بىرنەشە ساعات تىزەرلەپ وتىرىپ، جول شەتىندەگى جيەكتاستى بالعامەن شاعىپ، اربا وتەتىن جول جاساپ شىقتى.
زەينەتكەردىڭ ايتۋىنشا، ول 2013 -جىلدان بەرى قالالىق اكىمدىكتەن اۋرۋحاناعا كىرەر جەردە پاندۋس ورناتىپ بەرۋلەرىن سۇراپ كەلگەن. الايدا ەش جاۋاپ بولماعان، دەپ حابارلاندى كراسنويارسك تەلەكومپانياسىنىڭ سايتىندا.
قاريانىڭ ەسىمى - ۆلاديمير جۋرات. ول 20 جىلدان بەرى ارباعا تاڭىلعان. قوس اياعى جانە وڭ قولىنىڭ ءبىر بولىگىنەن جان كەتكەن زەينەتكەر كۇنارا شاھاردىڭ توتمينا كوشەسىندەگى اۋرۋحاناعا كەلىپ تۇرۋى كەرەك. ءبىراق، ءار كەلگەن سايىن جول شەتىندەگى بيىك قويىلعان جيەكتاس وعان بوگەت بولعان دا تۇرعان.
«وسى كوشەمەن ءجۇرۋ مۇمكىن ەمەس. ەش جەردە پاندۋس جوق. بۇلاي بولا ما؟ بۇل دەگەن ءبىزدى، مۇمكىندىگى شەكتەۋلى جانداردى، مازاق ەتۋ عوي»، - دەيدى ۆلاديمير جۋرات.
