مەملەكەتتىك حاتشى: ماۋسىم - رامىزدەر ايى
«وسى جىلدىڭ ناۋرىز ايىندا ەلباسى جارلىعىمەن تاۋەلسىزدىگىمىزدىڭ 25 جىلدىعىن مەرەكەلەۋدىڭ تۇجىرىمداماسى بەكىتىلگەن بولاتىن. سوعان وراي جۇمىس جوسپارى قابىلداندى. اتالعان جوسپارعا، تۇجىرىمداماعا سايكەس، ماۋسىم ايى رامىزدەر ايى دەپ سانالادى. سوندىقتان، وسى ايدا رامىزدەرىمىزدى تەرەڭ ناسيحاتتاپ، جۇرگىزگەن جۇمىستارىمىزدى كورسەتۋىمىز كەرەك»، - دەدى وتىرىستى اشقان مەملەكەتتىك حاتشى.
وتىرىستا ق ر ىشكى ىستەر مينيسترلىگى، سونىمەن قاتار الماتى، جامبىل، باتىس قازاقستان وبلىستارى اكىمدىكتەرىنىڭ مەملەكەتتىك رامىزدەردى پايدالانۋ جانە ناسيحاتتاۋ جونىندەگى جۇمىستارى تۋرالى ەسەپتەرى تىڭدالدى. كوميسسيا مۇشەلەرىنىڭ تارابىنان اتالعان ورتالىق جانە جەرگىلىكتى مەملەكەتتىك ورگانداردىڭ جۇمىسىنا جان-جاقتى تالداۋ جاسالدى.
ۋاكىلەتتى مەملەكەتتىك ورگانداردىڭ باسشىلارىنىڭ نازارى مەملەكەتتىك رامىزدەر تۋرالى زاڭنامالاردىڭ بۇزىلۋىنا جول بەرمەۋ، ونىڭ ىشىندە ۇنەمى باقىلاۋدى قامتاماسىز ەتۋ، قۇقىقتىق قولدانۋ تاجىريبەسىن جاڭعىرتۋ، سونىمەن بىرگە مەملەكەتتىك رامىزدەردى قولدانۋ جانە ناسيحاتتاۋ سالاسىن باقىلاۋدى كۇشەيتۋ ماسەلەرىنە اۋدارىلدى.
وتىرىس قورىتىندىسى بويىنشا ناقتى تاپسىرمالار مەن ۇسىنىستار بەرىلدى.
اۆتور: مارلان جيەمباي
