الماتىدا اۋلا سىپىرۋشىلار اراسىندا بايقاۋ جاريالاندى

استانا. قازاقپارات - تازالىق مادەنيەتىن قالىپتاستىرۋعا بارىنشا كۇش سالىپ جۇرگەن اۋلا سىپىرۋشىلاردىڭ ەڭبەگى كوپ رەتتە باعالانا بەرمەيدى.

تاڭسارىدە ەلدەن ەرتە تۇرىپ، قولىنا سىپىرتقى ۇستاعان اۋلا تازالاۋشىلارعا جاناشىرلىق تانىتقان «ناعىز الماتى» قوعامدىق قورى ارنايى بايقاۋ جاريالادى.

اۋلا سىپىرۋشىنىڭ ەڭبەگى ەرەن. ءبىراق، بۇل جۇمىستى كوپ ادام باعالامايدى. الماتىدا اۋلا سىپىرۋشىنىڭ جۇمىسى تاڭعى ساعات 6:00 دە باستالادى. قالا تۇرعىندارى ۇيقىدان ويانعانشا، اۋلا دا تازا، اينالا دا كورىكتى. ايلىق ەڭبەك اقاسى 40 مىڭ تەڭگەدەن اسپايتىن قاراپايىم جانداردىڭ قوعامعا قوسقان ۇلەسى زور. قالاداعى وسى الەۋمەتتىك ماسەلەگە نازار اۋدارعان بەلسەندى توپ بيىل ءتورتىنشى جىل قاتارىنان «ەڭ ۇزدىك اۋلا سىپىرۋشى» بايقاۋىن جاريالاپ وتىر.

وعان قاتىسۋعا جۇزدەن استام ءوتىنىش تۇسكەن.

مۇراتجان جاقىپباي، پاتەر يەلەرى كووپەراتيۆىنىڭ ءتوراعاسى:

- بۇل -  جاقسى بايقاۋ. وسىنداي بايقاۋلار كوبىرەك بولسا، الماتى قالاسىنداعى اۋلا سىپىرۋشىلاردىڭ ءوز جۇمىسىنا دەگەن بەلسەندىلىگى ارتادى.

بايقاۋدىڭ باستاماسىنا قالالىق ءماسليحاتتىڭ دەپۋتتارى شاقىرىلعان. ولار دا «مامىر-7» شاعىن اۋدانىندا ورنالاسقان اۋلانى كورىكتەندىرۋگە اتسالىستى. ال، بايقاۋعا قاتىسۋعا ءوتىنىش بەرۋ 15 ماۋسىمعا دەيىن جالعاسادى. بيىل ەڭ ۇزدىك اۋلا سىپىرۋشى بايقاۋىنىڭ جۇلدە قورى -  650 مىڭ تەڭگە. ءبىرىنشى ورىندى يەلەنگەن تازالىق ساقشىسىنا 200 مىڭ تەڭگە سىياقى تاعايىندالعان. داۋىس بەرۋ ونلاين جۇيەسى ارقىلى «ناعىز الماتى» قوعامدىق قورىنىڭ الەۋمەتتىك پاراقشاسىندا جۇرگىزىلەدى.

www.24.kz