استاناعا كولىكپەن كىرۋ اقىلى بولۋى مۇمكىن

استانا. قازاقپارات - استانا قالاسى قوعامدىق كەڭەسىنىڭ وتىرىسىندا ەلورداعا كىرۋدى اقىلى ەتۋ مۇمكىندىگى قارالدى، دەپ حابارلايدى ەلوردا اكىمدىگىنىڭ رەسمي سايتى.

«بۇگىنگى تاڭدا قالادا تاۋلىگىنە 400 مىڭعا جۋىق كولىك تىركەلەدى، سونداي-اق، ەلورداعا التى باعىتتان تاۋلىگىنە 74 مىڭعا جۋىق كولىك كەلەدى، بۇل كەپتەلىس تۋدىرىپ، كولىكتەردى تۇراققا قويۋ ماسەلەسىن قيىنداتادى. ترافيكتى شەكتەۋدىڭ ەڭ ءتيىمدى جولدارىنىڭ ءبىرى - قالاعا كىرۋدى اقىلى ەتۋ. ءبىز قالا اۋماعىندا كوشەلەردىڭ بەلگىلى ءبىر ۋچاسكەلەرىن اقىلى قىلۋدى ۇسىنامىز»، - دەدى ە. سۇلەيمەنوۆ.

ناقتى قاي ۋچاسكەلەردىڭ اقىلى بولاتىنى ازىرگە بەلگىسىز. قوعامدىق كەڭەس مۇشەلەرى وسى ماسەلەگە قاتىستى كوپ ەسكەرتۋ جاساپ، سوگىس ايتتى. وسىعان بايلانىستى اقىلى تۇراقتار جوباسى بويىنشا قوسىمشا قۇجاتتار، تۇسىندىرمەلەر، سىزبالار سۇراتىپ، ماسەلەنى قوعامدىق كەڭەستىڭ كەلەسى وتىرىسىندا قاراۋ تۋرالى شەشىم قابىلداندى. قالاعا كىرۋدى اقىلى ەتۋگە قاتىستى ەشقانداي قورىتىندى شىعارىلعان جوق.

ە. سۇلەيمەنوۆ، سونداي-اق، استاناداعى جولاۋشىلار كولىگىنىڭ جۇمىسى تۋرالى اقپاراتپەن تانىستىردى.

«قازىرگى كەزدە 86 قالالىق مارشرۋتتىڭ 64 ءى شىعىندى بولىپ كەلەدى، سەبەبى 90 تەڭگەلىك تاريف 2014-جىلى ەنگىزىلگەن، سايكەسىنشە، ەكى جىلدا ەكونوميكالىق جاعداي وزگەردى. سوندىقتان ءتاريفتى كوتەرمەۋ ءۇشىن سۋبسيديالاۋ كەرەك»، - دەدى ول.

قوعامدىق كەڭەس مۇشەلەرى سۋبسيديالاۋدى قولدادى. الداعى ەكى جىلدا قوعامدىق كولىكپەن ءجۇرۋ تاريفىن بۇرىنعى دەڭگەيدە - 90 تەڭگە مولشەرىندە قالدىرۋ جوسپارلانعان.