ەلوردادا مۇمكىندىگى شەكتەۋلى ادامدارعا ارنالعان تەگىن كۋرستار اشىلدى

استانا. قازاقپارات - ەلوردادا مۇمكىندىگى شەكتەۋلى تۇلعالاردى، سونىڭ ىشىندە ەستۋ قابىلەتى بۇزىلعاندار قولدان بۇيىمدار، اشەكەيلەر جاساۋدى تەگىن ۇيرەنەدى، دەپ حابارلادى قالالىق اكىمدىكتىڭ باسپا ءسوز قىزمەتى.

- العاش رەت كۋرستار 2010-جىلى وتكەن. وتكەن جىلى ەلوردا اكىمدىگىنىڭ قولداۋىمەن، «كومەك» الەۋمەتتىك كومەك كورسەتۋ ورتالىعى اشىلدى. وندا سۇلۋلىق سالونى بار، مۇگەدەكتىگى بار استانالىقتاردى وقىتىپ جۇرگەنىمىزگە ءبىر جىل بولدى. ءۇش ايلىق وقۋ اياقتالعان سوڭ تاجىريبە باستالادى. بىلتىر كۋرستى ءتامامداعان قىزداردىڭ جارتىسى وسى سالوندا، كەيبىر باسقا جەرلەردە جۇمىس ىستەپ ءجۇر، - دەيدى «جاسنۇر» ساڭىراۋلار قاۋىمداستىعى» قوعامدىق بىرلەستىگىنىڭ ءتوراعاسى قىزىلگۇل سەمبينا.

بيىل ساباقتار مامىر ايىندا باستالدى. شاشتارازدىڭ، مانيكيۋر شەبەرلەرىنىڭ كۋرستارى بار، جوبانى ىسكە اسىرعان ۋاقىتتىڭ ىشىندە 50 استام مۇمكىندىگى شەكتەۋلى تۇلعا وقىتىلدى، ەندى ولار قىزمەت كورسەتىپ، اقشا تابا الادى، جۇمىسسىزدار ساناتىنان ءوزىن-ءوزى جۇمىسپەن قامتىعاندار ساناتىنا وتەدى. بۇل جولى مۇگەدەكتىگى بار 15 ادام وقىپ جاتىر. سالونداعى كۋرستاردان باسقا، تابيعي تاستاردان اشەكەيلەر جاساۋ بويىنشا ساباقتار وتكىزىلىپ، تىگىن شەبەرحانالارى جۇمىس ىستەيدى. كۇزگە قاراي كىلەم توقۋ ۇيىرمەسىن، جيھاز سەحىن اشۋ جوسپارلانعان.

- توپقا كوپ ادامدى قابىلداۋعا بولمايدى، ءبىر توپتا 5-6 ادام عانا وقيدى، سوندا ءتيىمدى بولادى، سونىمەن قاتار، بىزبەن بىرگە ىم ءتىلىنىڭ ماماندارى دا جۇمىس ىستەيدى، - دەدى ق. سەمبينا.

بۇدان باسقا، ورتالىقتا حالىقتىڭ مۇقتاج توپتارىنا، مۇگەدەك بالالاردى تاربيەلەپ وتىرعان وتباسىلارعا، مۇگەدەكتەرگە، كوپ بالالى جانە تۇرمىسى تومەن وتباسىلارعا كيىم-كەشەك، ويىنشىقتار، كىتاپتار، اياق كيىم، ازىق-تۇلىك تۇرىندە قايىرىمدىلىق گۋمانيتارلىق كومەك كورسەتىلەدى.