قىتايدا قازاق جاستارىنىڭ تۇڭعىش رەتكى «جاقسىدان شاراپات» اتتى بايانداما جاساۋ شاراسى ۇيىمداستىرىلدى- فوتو
بۇل رەتكى ءىس-شارانى قىتاي قازاقتارىنىڭ ادەبي ۇنحات تەكشەسى بولعان «ساق تايپاسى» جانە «شاپاعات» مەيىر باعىشتاۋ توبى مەن «شاڭعاي كەرنەۋ ساۋدا-ساتتىق شەكتى جارنا سەرىكتىگى» بىرلەسىپ وتكىزدى. شارانىڭ ماقساتى ىشكى ولكەدەگى قازاق جاستارىنىڭ بارىس-كەلىس جاساۋىن ىلگەرلەتىپ، ءوزارا ءتۇسىنىسۋ، سەلبەسۋ جانە ەركىن پىكىر الماستىرۋىنا ءتيىمدى تەكشە ازىرلەۋ.
بۇل كۇنگى شارادا ىشكى ولكەدە ءومىر سۇرىپ، تالپىنىس جاساپ جاتقان قازاق ۇلتىنىڭ ءۇش جاس دارىندى ازاماتى ياعني، شاڭعاي ۇشاق جوبالاۋ، زەرتتەۋ ورنىنىڭ ينجەنەرى سالتانات بولات ۇلى، قازاقستان AE توبى شاڭعاي ءىس باسقارماسىنىڭ تىرەكتى قىزمەتكەرى نۇرلان باقىتبەك ۇلى جانە «شاپاعات» مەيىر باعىشتاۋ توبىنىڭ جاۋاپتىسى، دوكتور ءدىلدار دۇيسەن قىزى قاتارلى تالانتتى جاستار تالعامدى دا، تارتىمدى باياندامالار جاسادى.
اتالمىش شاراعا قوعامنىڭ ءار سالاسىندا جۇمىس جاساپ جاتقان قازاق زيالىلارى مەن ستۋدەنتتەر جانە قازاقستاننىڭ قىتايداعى وقىپ جاتقان ستۋدەنتتەرى بولىپ 80 نەن استام ادام قاتىستى. ولار ءۇش جارىم ساعاتقا جالعاسقان جيىن بارىسىندا قازاقتىڭ ءداستۇرلى سالت-ساناسى مەن ويلاۋ فورماسىنان الشاق بولعان وسىناۋ ورتادا قالاي دامىپ، وسى ورتانىڭ قيىنشىلىقتارىنا قالاي توتەپ بەرگەنىن، سونداي-اق، وزدەرىنىڭ ءومىر كەشىرمەلەرىن، سەزىنگەن جانە ويعا تۇيگەن تاجىريبەلەرىن، تابىستارى مەن جەتىستىكتەرىن جينالعان كوپشىلىكپەن ءبولىستى.
قازاقستاننان وقۋعا كەلگەن ستۋدەنت قىز لينا تالقى سوڭىندا: «بۇرىن ءبىزدىڭ جاستاردىڭ باس قوسۋى كوبىندە ويىن-تاماشا، ءىشىپ-جەۋمەن وتەتىن، مۇنداي ماعىنالى ءارى ەمىن-ەركىن تالقى كەڭەسكە تۇڭعىش رەت قاتىناسىپپىن، كوپتەگەن بىلىمدەرگە يە بولدىم، وسى شارانى وتكىزگەن ورىنعا راقىمەت ايتامىن» دەدى. كورەرمەندەردىڭ سۇراۋ قويۋى كەزەڭىندە قازاقستاننان كەلگەن جانە ءبىر ستۋدەنت تەبىرەنگەن كوڭىل-كۇيىنە ءازىلىن ارلاستىرىپ: «مەن بۇرىن قازاقتان جىلۋعا ۇشاق اتاعان باسباي دەگەن ادام بارىن عانا بىلەتىنىمىن، بۇگىن بۇل ارادا ۇشاق جاسايتىن جانە ءبىر قازاقتىڭ بار ەكەنىن كوردىم جانە تانىستىم» دەدى.
وسى ءىس-شارانى ۇيىمداستىرۋشى ورىننىڭ ءبىرى بولعان «ساق تايپاسى» ادەبي ۇنحات تەكشەسىنىڭ جاۋاپتىسى بۇل سىندارلى باس قوسۋ وسىمەن توقتاپ قالمايتىندىعىن ايتىپ، كەلەسى رەتكى بايانداما جاساۋ شاراسىن بەيجيڭدە ورنالاستىرىپ جاتقانىن جانە «ساق تايپاسى» گرۋپپاسىنىڭ وسىنداي ءىس-شارالاردى قىتايدىڭ باسقا دا قالالارىندا وتكىزۋدى جوسپارلاپ وتىرعاندارىن ايتتى.
اۆتور: مۇحتار مۇرات ۇلى
