وبلىس اكىمى بەردىبەك ساپاربايەۆ اۋىر دەرتكە شالدىققان سابيلەر ءۇشىن قان تاپسىردى - فوتو
دەپ حابارلايدى NUR. KZ ءتىلشىسى.
دارىگەرلەردىڭ الدىنا «ماعان شاي بەرەسىڭدەر مە؟» دەپ ازىلدەپ كەلگەن اقتوبە وبلىسىنىڭ اكىمى 450 گرام قان تاپسىردى. يگى شاراعا قولداۋ بىلدىرگەن بەردىبەك ساپاربايەۆ بارلىق اكىمدىك قىزمەتكەرلەرىنىڭ قان تاپسىرۋىن مىندەتتەدى.
بۇگىن اقتوبەلىك شەندىلەردەن ءجۇز ليترگە جۋىق قان الىنادى. قان تاپسىرۋ پروتسەسى اكىمدىك عيماراتىنىڭ ىشىندە ءوتتى. بالالاردى قورعاۋ كۇنى قارساڭىندا لەيكوزبەن اۋىراتىن جانە باسقا دا اۋىر دەرتكە شالدىققان بالالارعا قان تاپسىرۋعا ارنالعان شاراعا اكىمدىك قىزمەتكەرلەرىنىڭ ءبارى قولداۋ بىلدىرگەن.
«بۇل ۇلكەن باستاما. دەنساۋلىق ساقتاۋ سالاسىندا قانعا مۇقتاج جاندار ءۇشىن ۇلكەن كومەك بولادى. بۇگىنگى شارا ارقىلى قان قورىن ءجۇز ليترگە كوبەيتىپ وتىرمىز. بۇگىن تەك قان الىپ قانا قويماي، تۇراقتى دونورلاردى تىركەپ جاتىرمىز»، - دەيدى وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ.
يگى شاراعا بۇرىن- سوڭدى قان تاپسىرىپ كورمەگەن قىزمەتكەرلەر دە كەلدى.
وبلىس اكىمىنىڭ ورىنباسارى اسقار شەريازدانوۆ «العاش رەت قان تاپسىرعالى تۇرمىن» دەپ دارىگەردىڭ جانىنا كەلگەنىمەن، دونور بولا المادى. گەموگلوبينى 109-دى كورسەتكەن ورىنباساردى «قانىڭىز از» دەپ قايتاردى.
وبلىس اكىمىنىڭ تاعى ءبىر ورىنباسارى عاني ەسقاليەۆ ءوزىنىڭ وسىعان دەيىن تەك ستۋدەنت كەزدە عانا قان تاپسىرعانىن ايتتى. قان تاپسىرعانى ءۇشىن شوكولاد جەيتىنىن ەستىپ، شەندى بالاشا قۋاندى. قانى 1 -توپقا جاتقان شەندىنىڭ گەموگلوبينى 135- ءتى كورسەتىپ، دونور بولۋعا مۇمكىندىك الدى.
دارىگەرگەر اكىمدىك قىزمەتكەرلەرىنىڭ اراسىندا سيرەك كەزدەسەتىن قان توپتارىنىڭ كوپ بولعانىن ايتتى.
