ەسترادا جۇلدىزدارى بالالاردى مەرەكەمەن قۇتتىقتادى

استانا. قازاقپارات - جازدىڭ العاشقى كۇنى «استانا ارەنا» ستاديونىنىڭ الاڭىندا «بولاشاق ەنەرگياسى» اتتى اشىق اسپان استىندا ۇلكەن مەرەكەلىك ءىس-شارانىڭ قاتىسۋشىلارى حالىقارالىق بالالاردى قورعاۋ كۇنىنە وراي استانا قالاسىنىڭ بالالار اۋرۋحانالارى مەن بالالار ۇيلەرىن ارالاپ ءوز ىزگى تىلىكتەرىن ءبىلدىرىپ، بۇلدىرشىندەردى قۇتتىقتادى.

اتاپ ايتقاندا، مامانداندىرىلعان بالالار ۇيىندە «جىگىتتەر» توبى، رەسەيلىك «گرادۋسى» توبى سونداي-اق كاتيا لەل ءوز ونەرلەرىن كورسەتىپ بۇلدىرشىندەردى قۋانتىپ قايتتى. الماس كىشكەنبايەۆ، رەسەيلىك حاننا، ەگور كريد «انا مەن بالا ورتالىعىندا» ونكولوگيا بولىمىندە ەم قابىلداپ جاتقان بالالارعا دەنساۋلىق تىلەپ، بارشاعا قۋانىش سىيلادى. بۇل تۋرالى استانا قالاسىنىڭ مادەنيەت، مۇراعاتتار جانە قۇجاتتاما باسقارماسىنىڭ باسپا ءسوز قىزمەتىنەن حابارلادى.

«ءوز دەنساۋلىعى ءۇشىن كۇرەسىپ، ءومىر سۇرگىسى كەلگەن ءار بالا ءۇشىن ءبىز ءاردايىم ونەرىمىزدى پاش ەتۋگە دايىنبىز. ويتكەنى ەلىمىزدىڭ بولاشاعى - جاس بۇلدىرشىندەر. جاقسى كوڭىل كۇي قاشاندا ادام بالاسىنىڭ ۇزاق ءومىر سۇرۋىنە كەپىل بولعان! سوندىقتان، وسى بالالارعا قۋانىش پەن شاتتىق كورسەتۋگە ايانباي ەڭبەك ەتەمىز»، - دەدى الماس كىشكەنبايەۆ.

سونداي-اق، اناستاسيا ۆولوچكوۆا، ساتي كازانوۆا، «كەشيۋ» توبى جانە «جۇگىنىسوۆتەر» تريوسى الەۋمەتتىك قىزمەت كورسەتۋ ورتالىعىندا بالالارعا قۋانىش سىيلادى. «بالام-اي» مۇمكىندىگى شەكتەۋلى ورتالىعىندا مادينا ءسادۋاقاسوۆا، رەسەيلىك ماكسيم جانە تانيا تەرەشينا، سونداي-اق بۇركىت، رەسەيلىك اننا سەداكوۆا تانىمال انشىلەر پوتاپ جانە ناستيا 1№, 2№ قالالىق بالالار اۋرۋحاناسىنا بارىپ جاسوسپىرىمدەردى مەرەكەلەرىمەن قۇتتىقتاپ، جىلى لەبىزدەرىن ءبىلدىرىپ، جىلى ىقىلاسقا بولەپ قايتتى. وتاندىق جانە رەسەيلىك شوۋ بيزنەس وكىلدەرى تەك ءان ايتىپ قويماي، بالالارعا ارناعان سىي- سياپاتتارىن تاپسىردى.