الماتىلىقتار ورتالىق ساياباقتا بالالاردى قورعاۋ كۇنىن اتاپ ءوتتى

الماتى. قازاقپارات - بۇگىن الماتىدا مىڭداعان بالا جانە ولاردىڭ اتا-انالارى ورتالىق مادەنيەت جانە دەمالىس ساياباعىندا حالىقارالىق بالالاردى قورعاۋ كۇنىن اتاپ ءوتتى.

بۇل كۇنى ساياباققا كىرۋ تەگىن بولدى جانە وندا بالالار ءۇشىن ءار ءتۇرلى بايقاۋلار، جارىستار، فلەشموب، بالالار كوركەمونەرپازدار ۇجىمدارىنىڭ ورىنداۋىندا كونسەرتتەر ۇيىمداستىرىلدى. بالالاردى وسىناۋ حالىقارالىق مەرەكەمەن الماتى اكىمى باۋىرجان بايبەك قۇتتىقتادى.

«بۇگىن ءبىزدىڭ قالامىزدا ۇلكەن مەرەكە بولىپ جاتىر. بالالار - ءومىردىڭ گۇلى. ءبىزدىڭ ەلىمىز قازىر ولاردىڭ جان-جاقتى دامۋىنا بارلىق جاعدايدى جاساپ جاتىر. ەلباسى ساپالى ءبىلىم بەرۋ جۇيەسىن بالا باقشادان باستاپ جاساۋ كەرەكتىگىن ۇنەمى ايتىپ كەلەدى. سوڭعى بەس جىل ىشىندە الماتىدا 12 ورتا مەكتەپ، ءۇش تيپتىك بالا باقشا سالىندى جانە «بالاپان» مەملەكەتتىك باعدارلاماسى بويىنشا بالا باقشاعا باراتىن ءاربىر بالا ءۇشىن اي سايىن قوسىمشا 20,7 مىڭ تەڭگە تولەنەدى»، - دەدى ب. بايبەك.

سونىمەن قاتار، قالا باسشىسى الماتىدا قازىرگى تاڭدا 21 مىڭ بالانىڭ ءار ءتۇرلى جازعى ساۋىقتىرۋ لاگەرلەرىنە بارۋىنا قالا بيۋدجەتىنەن ءتيىستى قارجى ءبولىنىپ جاتقاندىعىن، سونداي-اق، ورتا مەكتەپتەردىڭ جانىنان كەم دەگەندە 26 مىڭ بالانى قامتيتىن ءار ءتۇرلى باعىتتاعى 700 دەي ۇيىرمە قۇرىلاتىندىعىن ايتتى.

«جاز - جىلدىڭ تاماشا مەزگىلى. سوندىقتان، ءبىز الەۋمەتتىك جاعىنان از قامتىلعان وتباسىلاردان 4000 عا جۋىق بالانىڭ لايىقتى دەمالۋى ءۇشىن قالا بيۋدجەتىنەن قارجى ءبولىپ جاتىرمىز. كوپ ۇزاماي 100 بالا بۋرابايداعى بەلگىلى «بالداۋرەن» لاگەرىنە جونەلتىلەدى. ءبىز بالالار باقىتتى ءومىر ءسۇرۋى ءۇشىن قولدان كەلگەننىڭ بارلىعىن جاساۋىمىز كەرەك. ەڭ باستىسى، ولار ناعىز وتانسۇيگىش پاتريوت ازامات بولىپ وسۋلەرى ءتيىس»، - دەدى ب. بايبەك.

اۆتور: ايبوتا جاپپاربەرگەن