گوريللانىڭ تورىنا ءتۇسىپ قالعان بالا جايلى وقيعاعا الەمدە كوپتەگەن ادامدار نارازىلىق تانىتىپ وتىر - كەسكىن
وقيعا ا ق ش- تاعى سينسينناتي قالاسىندا بولعان. قازىرگى ۋاقىتتا كىشىگىرىم جاراقات العان ايزەي ديكەرسون (Isiah Dickerson) ەم قابىلداپ جاتىر.
28 -مامىردا سينسينناتي زووباعىنىڭ قىزمەتكەرلەرى بالا ءتۇسىپ قالعان توردا جاتقان 17 جاستاعى حارامبە ەسىمدى گوريللانى اتىپ ولتىرگەن ەدى. مايمىل بالانى ۆولەر ىشىندە 10 مينۋتتاي ارلى-بەرلى سۇيرەپ جۇرگەن. كۋاگەرلەر وقيعانى كامەراعا ءتۇسىرىپ تۇرعان.
كەيىن زووباق قىزمەتكەرلەرى بالانىڭ ءومىرىن امان الىپ قالۋ ءۇشىن وسىنداي قادامعا بارۋعا تۋرا كەلگەنىن ايتادى. الايدا گوريللانى ءولتىرۋ تۋرالى شەشىمگە كوپشىلىك نارازىلىق تانىتىپ وتىر. ماسەلەن، Change.org سايتىندا قاراۋسىز قالعان بالانىڭ اتا-اناسىن جازالاۋ ءۇشىن پەتيتسيا پايدا بولدى. وعان 400 مىڭنان اسا ادام قول قويىپ ۇلگەرىپتى.
بالانىڭ اتا-اناسى 32 جاستاعى ميشەل گرەگگ پەن 36 جاستاعى ديون ديكەرسون ەكەن. ولاردىڭ ءتورت بالاسى بار. وتاعاسى توناۋ، قارۋدى زاڭسىز ساقتاۋ، ەسىرتكى اينالىمى، بۇزاقىلىق جانە وزگە دە قىلمىستار بويىنشا بىرنەشە مارتە سوتتى بولعان ەكەن. ول ەسىرتكى اينالىمىمەن اينالىسقانى ءۇشىن ءبىر جىلعا جۋىق ۋاقىت تۇرمەگە قامالعان. باسىلىمنىڭ مالىمەتىنشە، ەر ادام كەيىنگى كەزدە تۇزەلىپ، قازىرگى ۋاقىتتا فيرمادا جۇمىس ىستەيدى ەكەن.
ال بالانىڭ اناسى الاڭعاسارلىق تانىتتى دەپ ايىپتاعان جۇرتقا Facebook جەلىسىندەگى پاراقشاسىندا جاۋاپ بەردى. ونىڭ ايتۋىنشا، «جاعىمسىز جاعدايلار بولىپ تۇرادى». «قوعام دەرەۋ سوگۋگە دايىن، اتا-اناسى بالاسىنا قالاي قاراماي جۇرەدى، ءبىراق مەنى بىلەتىن، مەنىمەن تانىس ادامدار مەنىڭ قانداي ەكەنىمدى، بالالارىما ءجىتى قارايتىنىمدى بىلەدى. وقيعالار بولىپ تۇرادى، ءبىراق قاجەتتى ادامداردىڭ قاجەت ۋاقىتىندا كومەكتەسكەنىنە العىسىم شەكسىز. بالام قاۋىپسىزدىكتە، ول قازىر ءوزى ءجۇرىپ-تۇرا الادى، بولماشى جاراقات الىپتى، سىرىپ كەتكەن، سۇيەكتەرى سىنباعان، جاراقاتى جوق»، - دەپ جازدى ميشەل گرەگگ.
ABC تەلەارناسىنىڭ مالىمەتىنشە، وگايو شتاتىنداعى گاميلتون وكرۋگىنىڭ پروكۋرورلارى سەيسەنبى كۇنى سينسينناتي پوليتسياسىنىڭ بۇل ءىستى زەرتتەپ جاتقانىن جانە بولعان وقيعاعا قاتىستى قىلمىستىق ءىس قوزعاۋى مۇمكىن ەكەنىن مالىمدەگەن. الايدا ايىپتىڭ كىمگە تاعىلۋى مۇمكىن ەكەندىگى ناقتىلانباي وتىر.
