09:59, 01 - ماۋسىم 2016 | GMT +6
بۇكىل الەمدە قازاقستان ءدىنارالىق ديالوگتىڭ بەلسەندى ۇيىمداستىرۋشىسى رەتىندە باعالانادى - م. جۇما
استانا. قازاقپارات - كەشە، 31 -مامىردا استانا قالاسىندا قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلىنىڭ مىسىر اراب رەسپۋبليكاسىنىڭ ۋاقىفتار ءمينيسترى مۇحتار جۇمامەن كەزدەسۋى بولىپ ءوتتى، دەپ حابارلادى مينيسترلىكتىڭ باسپا ءسوز قىزمەتى.
كەزدەسۋ بارىسىندا قازاقستان- مىسىر ەلدەرىنىڭ بىرلەسكەن جوباسى بولىپ تابىلاتىن «نۇر- مۇباراك» ۋنيۆەرسيتەتى قىزمەتىنىڭ پارمەندىلىگىن ارتتىرۋ ماسەلەلەرى تالقىلاندى.
اڭگىمەلەسۋ بارىسىندا شەتەلدىك قوناق كەشەگى وتكىزىلگەن «دىندەر تەرروريزمگە قارسى» حالىقارالىق كونفەرەنتسياسىن وتكىزۋ دەڭگەيىنە جوعارى باعا بەردى. ول وسى رەتتە قازاقستان پرەزيدەنتىنىڭ ساليقالى باستامالارىنىڭ ارقاسىندا بۇكىل الەمدە قازاقستان ءدىنارالىق ديالوگتىڭ بەلسەندى ۇيىمداستىرۋشىسى رەتىندە باعالاناتىندىعىن اتاپ ءوتتى.
