تابيعات قۇپياسى: قۇستىڭ جۇمىرتقاسى نەگە كوكشىل بولادى؟

استانا. قازاقپارات - كوكشىل جۇمىرتقا ءشوپتىڭ اراسىندا، قارا جەردە بىردەن كوزگە تۇسەدى. كوپتەگەن قۇستار ءومىر سۇرەتىن ورتاسىنا ءتۇسى سايكەس كەلەتىن كوزگە شالىنا بەرمەيتىن ەلەسىز تۇستەگى جۇمىرتقا تابادى.

سوعان قاراماستان كەيبىر قۇستاردىڭ جۇمىرتقاسى اقشىل كوك ءتۇستى. عالىمدار وسى ەرەكشەلىكتى زەرتتەپ شىقتى.

The American Naturalist جۋرنالىندا نيۋ- يورك قالالىق ۋنيۆەرسيتەتىنىڭ پروفەسسورى ديەۆيد لاحتي مەن ونىڭ ارىپتەستەرى جاريالاعان عىلىمي ماقالادا كوكشىل جۇمىرتقانىڭ سىرى ەكى گيپوتەزامەن تۇسىندىرىلەدى.

عالىمداردىڭ تۇجىرىمى بويىنشا كۇن ساۋلەسى قۇس جۇمىرتقاسىنا ونداعى ءونىپ كەلە جاتقان ەمبريونعا ەكى ءتۇرلى قاۋىپ توندىرەدى: قابىققا سىڭگەن ينفراقىزىل تولقىن ونى قىزدىرىپ جىبەرۋى مۇمكىن، ال ىشكە ەنىپ كەتەتىن ۋلتراكۇلگىن ساۋلە ەمبريوگەنەز ۇدەرىسىنە كەدەرگى كەلتىرەدى.

ماقالا اۆتورلارى كوك ءتۇس ءوزىنىڭ كەمشىلىكتەرىنە قاراماستان وسى ەكى قاتەردەن ساقتاندىرادى دەپ بولجادى. ۋلتراكۇلگىن ساۋلە ۇرىققا جەتپەيدى ءارى جۇمىرتقا تەز قىزىپ كەتپەيتىندەي دەڭگەيدە جىلۋ قابىلدايدى.

 عالىمدار وزدەرىنىڭ بولجامدارىن زەرتحانادا قۇس جۇمىرتقالارىنا تاجىريبە جاساۋ ارقىلى دالەلدەپ شىقتى.