قۇتقارىلعان ۇكىنىڭ بالاپانىنا «بالاقاي» دەگەن ات قويىلدى

استانا. قازاقپارات - پاۆلودارلىق ورمانشىلار ۇكىنىڭ بالاپانىن قۇتقاردى، دەپ حابارلايدى pavlodarnews.kz.

«ۋسولكا شاعىن اۋدانىنداعى «جەتى اعايىن» مەشىتىنىڭ ماڭىندا قالا تۇرعىندارى ۇكىنىڭ بالاپانىن تاۋىپ الىپ، بىزگە حابارلاستى. قاناتى قاتايماعان بالاپان ۇيادان قۇلاپ ءتۇسۋى ىقتيمال. ءبىز ونى اقسۋ قالاسىنداعى جاس ناتۋراليستەر ستانساسىنىڭ قاراماعىنا تاپسىردىق»، - دەيدى قالالىق ورمان جانە جانۋارلار الەمىن قورعاۋ جونىندەگى مەملەكەتتىك مەكەمەسىنىڭ ديرەكتورى اجدار ءجۇسىپوۆ.

بۇعان دەيىن سەگىز اي بويى ءبىرقازاندى كۇتىپ، ەركىندىككە جىبەرگەن جاس ناتۋراليستەر ستانساسىنىڭ ديرەكتورى جانتوتى اقىشەۆانىڭ ايتۋىنشا، بالاپانعا «بالاقاي» (مالىش) دەگەن ات بەرىلگەن.

«بالاپان كۇنىنە 200 گرام تازا ەت جەيدى. ونىڭ جاعدايى جاقسارىپ قالدى»، - دەيدى ول.