الماتى پوليتسياسى مەديتسينالىق كلينيكاعا جاسالعان قاراقشىلىق شابۋىلدىڭ بەتىن اشتى
بۇل تۋرالى بۇگىن الماتى قالالىق ءى ءى د باسپا ءسوز قىزمەتىنەن حابارلادى.
ىشكى ىستەر دەپارتامەنتىنىڭ وپەراتيۆتىك بولىمشەسىنىڭ دەرەكتەرىنە سايكەس، 26- مامىردا بوستاندىق اۋدانىندا ورنالاسقان مەديتسينالىق ورتالىقتىڭ كەڭسەسىنە قاراقشىلىق شابۋىل جاسالعان. تۇنگى ساعات ءتورت شاماسىندا بەلگىسىز ءۇش ادام كىرەبەرىس ەسىكتىڭ اينەگىن سىندىرىپ، كلينيكانىڭ كەڭسەسىنە كىرەدى. ءسويتىپ، كۇزەتشىگە كۇش قولدانىپ، بىرنەشە كابينەتتەن كومپيۋتەرلىك مونوبلوكتار مەن مەديتسينالىق جابدىقتاردى ۇرلاعان.
كەلتىرىلگەن شىعىننىڭ جالپى سوماسى شامامەن 9 ميلليون تەڭگە بولعان.
«قاراقشىلار كۇزەتشىنىڭ «نيسسان تسەفيرو» ماركالى جەڭىل اۆتوكولىگىن دە ولجالاعان. جالپى كەلتىرىلگەن شىعىننىڭ سوماسىنا وسى كولىكتىڭ دە باعاسى ەنىپ وتىر. كۇدىكتىلەر وقيعا ورنىنان ءىز جاسىرىپ ۇلگەرگەن. الايدا، ارنايى جاساقتالعان تەرگەۋ-جەدەل توبى تاڭ اتا قاراقشىلار ۇرلانعان اۆتوكولىكتى تاستاپ كەتكەن جەردى انىقتادى. بۇدان ءارى، جەدەل ىزدەستىرۋ شارالارى بارىسىندا ۇرلىققا قاتىسقان ءۇش كۇدىكتىنىڭ اتى-جوندەرى بەلگىلى بولدى. ولار الماتى وبلىسىنداعى ەلدى مەكەندەردىڭ ءبىرىنىڭ تۇرعىندارى بولىپ شىقتى. 23 جاستاعى ەر ازاماتتار ءبىر-بىرىنە سىنىپتاستار بولىپ كەلەدى.
ولار ۇستالعاننان كەيىن، كەشەندى تەرگەۋ شارالارى، سونىڭ ىشىندە كۇدىكتىلەردىڭ تۇرعىلىقتى مەكەنجايلارى بويىنشا ءتىنتۋ جۇرگىزىلدى. سونىڭ ارقاسىندا بارلىق زاتتاي ايعاقتار تابىلدى. ال كۇدىكتىلەر ۋاقىتشا تەرگەۋ اباقتىسىنا قامالدى»، - دەدى الماتى قالالىق ءى ءى د كريمينالدىق پوليتسيا باسقارماسىنىڭ باستىعى، پوليتسيا پودپولكوۆنيگى جانبولات زيادين.
