سەنساتسيا قۋعان كەيبىر ب ا ق- تار تەرروريزمگە كومەكتەسىپ وتىر - امال ابداللا ال-كۋبەيسي
بۇگىن استانادا «دىندەر تەرروريزمگە قارسى» اتتى حالىقارالىق كونفەرەنسيا بارىسىندا ءسوز سويلەگەن بىرىككەن اراب امىرلىكتەرى فەدەرالدى ۇلتتىق كەڭەسىنىڭ ءتورايىمى دوكتور امال ابداللا ال- كۋبەيسي وسىلاي مالىمدەدى.
سپيكەردىڭ ايتۋىنشا، تەرروريزممەن كۇرەستە كەدەيلىك پەن بىلىمسىزدىكتىڭ الدىن الۋ ۇلكەن ءرول اتقارادى. «تەرروريستىك ۇيىم نەگىزىنەن كەدەيلىك شەگى شارىقتاعان وڭىرلەردە بەلەڭ الادى. بىلىمسىزدىككە كەلەتىن بولساق، بۇنىڭ دا قاتەردى ارتتىرۋداعى ءرولى زور. ارينە، ءبىلىم تەك مەكتەپتە عانا ەمەس، ۇيدە دە، دالادا دا، تەلەارنالاردا دا، ينتەرنەتتە دە بەرىلىپ جاتىر. دەگەنمەن، ول قانداي ءبىلىم؟ الەۋمەتتىك جەلىلەر ارقىلى تارالاتىن ءبىلىم دە بۇعان ءوز ۇلەسىن قوسۋدا. وسىعان قاتىستى ءبىز ءدىندى اعارتۋشىلىق ارقىلى تۇسىندىرەتىن كەڭ اۋقىمدى ءبىلىم كەشەنىنە كىرىسۋگە ءتيىسپىز»، - دەدى امالابداللا.
ونىڭ ايتۋىنشا، تەرروريزمگە قارسى ءبىلىم جۇيەسىن دامىتۋ ۇلكەن جىگەردى، ورتاق شارالار كەشەنىن قاجەت ەتەدى. «ەكسترەميستەردىڭ داۋىسى سانالى، ءبىلىمدى دىنيەلەرىنىڭ داۋىسىنان دا قاتتى شىعۋىنا جول بەرمەۋگە ءتيىسپىز. بۇل رەتتە تاياۋ شىعىستاعى تەرروريزمنىڭ يسلامعا ءۇش قايناسا سورپاسى قوسىلمايتىنىن ەرەكشە اتاعىم كەلەدى. يسلام اشىق ءومىر سۇرۋگە شاقىرىپ، بەيبىتشىلىك پەن سىيلاستىقتى، ادامزات، دىندەر اراسىنداعى ءوزارا قۇرمەتتى دارىپتەيدى. يسلام - ماحاببات پەن سۇيىسپەنشىلىك ءدىنى. «ۇستامدى يسلام» نەمەسە «راديكالدى يسلام» دەگەن ۇعىم جوق. ءبىر عانا يسلام بار، ول الەمدەگى ەڭ كەشىرىمدى، ەڭ كوركەم يسلام»، دەدى مارتەبەلى مەيمان.
بۇدان بولەك، امال ابداللا كەيبىر بۇقارالىق اقپارات قۇرالدارى ادەيى ىستەمەسە دە تەرروريزمگە كومەكتەسىپ جاتقانىن اتاپ ءوتتى. «كەيبىر ب ا ق سەنساتسيا (تاڭعالدىرۋ - رەد.)قۋىپ، اقپاراتتى دۇرىس اشىپ كورسەتپەۋى ارقىلى تەرىس اسەرگە ۇرىنىپ وتىر. وسىنى دا ويلانۋعا ءتيىسپىز»، - دەدى ول.
اۆتور: قانات مامەتقازى ۇلى
