ۇلتتىق كيىمدەرگە زاماناۋي ءوڭ بەرگەن ديزاينەر - كەسكىن

استانا. قازاقپارات - اقتاۋلىق سانگەر نۇرجامال نۇرپەيىسوۆا قازاقتىڭ ۇلتتىق كيىمدەرىنە زاماناۋي ءوڭ بەرىپ، ءسان الەمىندە ءوز ورنىن تاۋىپ وتىر.

وسىدان 15 جىل بۇرىن ءىسىن باستاپ، «نۇر-شاح» اتتى وتاندىق برەند قالىپتاستىرعان. بۇل ءسان ءۇيىنىڭ كيىمدەرى مەن اشەكەيلەرى حالىقتىڭ جوعارى باعاسىن الىپ ۇلگەرگەن.

نۇرجامال نۇرپەيىسوۆا، ءسان ءۇيىنىڭ ديرەكتورى:

- ءسان الەمىنە كەلگەندەگى ءبىرىنشى ماقساتىم ۇلتتىق ويۋ- ورنەكتى كۇندەلىكتى تۇرمىسقا ەنگىزۋ بولدى. اسىرەسە، ماڭعىستاۋدىڭ وزىندىك ناقىشتارىن تانىتقىم كەلدى. ال، تابىستىڭ كىلتى -  ەڭبەك پەن ۇنەمى ىزدەنىستە بولۋدا دەپ بىلەمىن. ەشقاشان بولدىم- تولدىم دەپ، ءبىر ورىندا توقتاپ قالۋعا بولمايدى.

بەشپەت، قامزول، كاجەكەي، ساۋكەلە مەن ادەمى اشەكەيلەر. ءسان ۇيىندە ايىنا 300 دەن استام تۋىندى ومىرگە كەلەدى. ۇلتتىق قولونەردى ۇلىقتاعان حالقىمىز وتاندىق ءونىمنىڭ قادىرىن بىلەدى. ءتىپتى، قازاقى كيىمدەر رەسەي مەن دۋباي سەكىلدى الىس-جاقىن شەتەلدە سۇرانىسقا يە.

جاڭىل الىبايەۆا، تاپسىرىس بەرۋشى:

- وسى ءسان ۇيىنەن باسقا ۇيگە تاپسىرىس بەرگىم كەلمەيدى. سەبەبى، بۇل ءسان ۇيىندە وتە سىپايى جۇمىسشىلارى. ءارقاشان جاڭارىپ تۇرادى. كونە مۇرالارىمىزدى جاڭعىرتىپ، قازىرگى ناقىشتا، ءساندى كيىمدەر تىگەدى.

ديزاينەر بىرنەشە اي بۇرىن «ساكۋرا» اتتى جاڭا توپتاماسىن ۇسىندى. قازىر ەكىنشى كيىمدەر جەلىسىن شىعارا باستادى. جاڭا ساۋدا بەلگىسى ارقىلى جاپپاي شىعارىلىمداعى كيىمدەر ءوندىرىسى جولعا قويىلىپ، حالىققا قولجەتىمدى باعادا ساتىلماق.

Kazakh-tv.kz