استانادا «قاراعاندى لاگەرى» ارحيپەلاگى» اتتى زاماناۋي ونەر تۋىندىلارى كورمەسى اشىلدى

استانا. قازاقپارات - ق ر ۇلتتىق مۋزەيىندە ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارنالعان «قارلاگ» ارحيپەلاگى» اتتى زاماناۋي ونەر تۋىندىلارى كورمەسى اشىلدى.

بۇل كورمە ق ر پرالامەنتى ءماجىلىسىنىڭ دەپۋتاتى نۇرلان دۋلاتبەكوۆ پەن قازاقستاننىڭ سۋرەتشىلەرى اينۇر سادەنوۆا، الماگۇل مەڭلىبايەۆا جانە سىرلىبەك بەكبوتايەۆتىڭ بىرلەسكەن كوركەم-گۋمانيتارلىق جوباسى.

اۆتورلاردىڭ ايتۋىنشا، شارانىڭ ماقساتى وتكەن تاريحىمىزدا بولعان قايعىلى وقيعالاردىڭ تابيعاتى مەن تەرەڭ ءمانىن جۇرتشىلىققا جەتكىزۋگە نەگىزدەلگەن، سونداي-اق قازاقستاننىڭ 1930-1956-جىلدار اراسىنداعى كەزەڭدە بۇرمالانعان تاريحىن قايتا قالپىنا كەلتىرۋگە، 11 ارنايى ەڭبەكپەن تۇزەۋ لاگەرلەرىندە ۇستالعان ميلليوننان استام تۇتقىننىڭ تاۋقىمەتتى تاعدىرىن كەڭىنەن ايتىپ بەرۋگە ارنالىپ وتىر.

مۋزەي زالدارىنىڭ بىرىندە سەگىز ينستاللياتسيا كوپشىلىك نازارىنا ۇسىنىلىپ وتىر. ونىڭ ءبىرى الماگۇل مەڭلىبايەۆاعا تيەسىلى. بۇگىندە ول مۋلتيمەديا-سۋرەتشى رەتىندە تانىلىپ وتىر. سۋرەتشى ۇسىنعان «شانەل 5№» دەپ اتالاتىن ينستاللياتسيادا «الجير» تۇتقىنى بولعان ايەلدىڭ ەستەلىگى قامتىلعان.

ال نۇرلان دۋلاتبەكوۆتىڭ قاراعاندى لاگەرى تۋرالى كىتاپ ينستاللياتسياسىندا فوتوالبومدار، وچەرەكتەر، تاريحي مالىمەتتەر مەن فاكتىلەر، زەرتتەۋلەر ، ەستەلىكتەر جيناقتالعان.

اتالعان كورمە ۇلتتىق مۋزەيدە 30- مامىر مەن 15- شىلدە ارالىعىندا وتەدى.

اۆتور: رۋسلان عابباسوۆ