نيۋ-يوركتەگى باس كونسۋلدىق امەريكالىقتار اسىراپ العان قازاقستاندىق بالالاردى مەرەكەمەن قۇتتىقتادى
بۇل تۋرالى ق ر سىرتقى ىستەر مينيسترلىگىنىڭ باسپا ءسوز قىزمەتىنەن حابارلاندى.
سالتاناتتى شارانى اشۋ بارىسىندا باس كونسۋل راۋشان ەسبولاتوۆا بالالار كۇنى مەرەكەسىنىڭ تاريحى تۋرالى اڭگىمەلەپ بەردى. ونىڭ ايتۋىنشا، حالىقارالىق بالالاردى قورعاۋ كۇنى 1949 -جىلى قاراشا ايىندا پاريجدە ايەلدەردىڭ حالىقارالىق دەموكراتيالىق فەدەراتسياسى تاراپىنان بەكىتىلگەن. وسىلايشا، مەرەكە العاش رەت 1950 -جىلى اتالىپ ءوتىلدى.
بۇدان بولەك، باس كونسۋل بالالاردى قۇتتىقتاي كەلە، بۇنداي مەرەكەنىڭ ا ق ش- تا تۇرىپ جاتقان قازاقستاندىق بالالار ءۇشىن وزدەرىنىڭ مادەني، رۋحاني تىلدىك ەرەكشەلىكتەرىن ۇمىتپاۋعا زور سەپتىگىن تيگىزەتىنىن اتاپ ءوتتى.
«باس كونسۋلدىق ا ق ش- تا اسىراپ الىنعان بالالارعا، ولاردىڭ تىرشىلىك ورتاسىنا ەرەكشە نازار اۋدارادى. بۇل رەتتە كونسۋلدىق جىل سايىن ءداستۇرلى تۇردە ءوتىپ تۇراتىن «Kazapalooza» شاراسىنا قاتىسىپ كەلەدى. وسى الاڭدا قازاقستاندىق بالالاردى اسىراپ العان امەريكالىق وتباسىلاردىڭ باسىم بولىگى باس قوساتىنى بەلگىلى»، - دەدى ول.
ءوز كەزەگىندە بالا اسىراپ العان اتا-انالار جۇزدەگەن قوناقتاردىڭ باسىن قوسقان شاراعا شىنايى العىستارىن جەتكىزىپ، ونىڭ بالالارعا جاعىمدى اسەر بەرەتىنىن العا تارتتى. قوناقتار مەن بالالار وسى كۇنى قازاقتىڭ ۇلتتىق اسحاناسىنان ءدام تاتىپ، ۇلتتىق ويىندار وينادى.
اۆتور: قانات مامەتقازى ۇلى
