قىتاي كورپوراتسياسى ەلىمىزدە وق- ءدارى شىعاراتىن زاۋىت سالماق
وسى امبەباپ ءىرى كورپوراتسيا ەلىمىزدە زاۋىت سالماق. ءىرى كاليبرلى وق- ءدارى دايىندايتىن. قورعانىس مينيسترلىگىنىڭ اسكەري- تەحنيكا ساياسات دەپارتامەنتى باستىعىنىڭ ورىنباسارى يۋري بەليايەۆ «استانا» ارناسىنا بەرگەن ارنايى سۇحباتىندا ايتتى.
ايدىڭ سوڭىندا اسكەري تەحنيكا مەن قارۋ- جاراق قويىلاتىن «KADEX-2016» كورمەسى وتەدى، سونىڭ اياسىندا جاسالاتىن كەلىسىم- شارتتاردىڭ ءبىرى كورىنەدى. بەليايەۆ قىتايلاردىڭ ارنايى زاۋىت سالاتىنىن عانا ەمەس، سانكسيالار قىسپاعىنداعى رەسەيگە اسكەري تەحنيكانىڭ قۇرامداس بولىكتەرىن جەتكىزۋ كولەمىن ۇلعايتاتىندارىن جەتكىزدى.
يۋري بەليايەۆ، ق ر قورعانىس مينيسترلىگى اسكەري- تەحنيكا ساياسات دەپارتامەنتى باستىعىنىڭ ورىنباسارى:
سانكسيالارعا بايلانىستى جاعدايدى بىلەسىزدەر. كەيبىر مەملەكەتتەر ءبىر- بىرىمەن ساۋدا جاساي المايدى. سوندىقتان ءبىزدىڭ ەلىمىزگە وسى كەڭىستىكتى الۋ كەرەك. قىتايدىڭ «Norinco» كومپانياسىمەن قازاقستان رەسپۋبيكاسىنا ءوندىرىس ورىندارىن اكەلۋ بويىنشا ىنتىماقتاستىق تۋرالى مەموراندۋمعا قول قويىلادى دەپ جوسپارلانىپ وتىر. ناقتىراق ايتقاندا، ءىرى كاليبرلى وق- ءدارى شىعاراتىن زاۋىت سالۋ جوسپارى.
قىتاي ۇكىمەتىنىڭ ءبىرقاتار ءوندىرىس وشاقتارىن قازاقستانعا، قازاقستانمەن شەكاراعا كوشىرۋ ماسەلەسىن قاراستىرىپ جاتقانىن Vlast.kz پورتالى دا جازدى. ولار استانا ەكونوميكالىق فورۋمىنا كەلگەن الەمدەگى ءىرى پورت وپەراتورلارىنىڭ ءبىرى «DP World» ديرەكتورلار كەڭەسىنىڭ ءتوراعاسىنا سىلتەمە جاسايدى.
سۇلتان احمەد يبن سۋلايم جۇكتەردى تەڭىز ارقىلى تاسىلمالداۋعا 40 كۇننەن 60 كۇنگە دەيىن، ال تەمىر جول ارقىلى تاسىمالداۋعا 10-15 كۇن كەتەتىنىن ايتقان. ارينە تەمىر جول قىزمەتى قىمبات - مىسالى، قىتايدان ەۋروپاعا ءبىر كونتەينەردى تەڭىز ارقىلى جەتكىزۋ 350-500 دوللار بولسا، تەمىر جولمەن 5000 دوللار. ۋاقىتتىڭ وتە قىمباتتىعى وسىندايدا كورىنەدى.
ەكسپورت شىعىنداردى ازايتۋ ءۇشىن قىتاي ءوندىرىس وشاقتارىن ەۋروپاعا جاقىنداتاتىنىن، ونىڭ ىشىندە قازاقستانعا دا ورنالاستىرۋ جوسپارى بارىن ايتقان.
«بولاشاقتا قىتاي ءوز وندىرىستەرىن ەۋروپاعا جاقىن، قازاقستان جاعىنا قاراي كوشىرۋى مۇمكىن. مەن سولاي بولادى دەپ ويلايمىن. قازىر قازاقستان ترانسپورتتىق مۇمكىندىكتەردىڭ ارتىقشىلىقتارىن پايدالانۋ ءۇشىن قورعاس پورتىن لوگيستيكالىق پارك تۇرىندە دامىتىپ جاتىر»، - دەگەن سۇلتان احمەد يبن سۋلايم.
https://astanatv.kz
