فوتوشوپ سۋرەتتىڭ جوق بولىكتەرىن ەندى ءوزى سالا الادى - كەسكىن

استانا. قازاقپارات - بەلگىلى گرافيكالىق Adobe Photoshop رەداكتورىنىڭ جاڭا نۇسقاسىندا سۋرەتتىڭ جوق بولىكتەرىن اۆتوماتتى تۇردە ءوزى سالا الاتىن مۇمكىندىك پايدا بولدى.

بۇل تۋرالى Adobe وكىلدەرى Twitter الەۋمەتتىك جەلىسىندەگى پاراقشاسىندا ۇسىندى.

بۇل قىزمەت سۋرەتكە تۇسىرەر كەزدە كامەرانى قيسىق ۇستاعان جاعدايدا قاجەت بولادى ەكەن. سۋرەتتى اينالدىرعاننان كەيىن بۇرىشتارداعى بوس كەڭىستىكتەر قالىپ قويادى. وسىعان دەيىن قولدانۋشىلار سۋرەتتىڭ شەتكى ايماقتارىن كەسىپ تاستاپ، سۋرەتتەگى قاجەتتى نىسان كورىنبەي قالاتىن.

Adobe Photoshop اۆتوماتتى تۇردە سۋرەتتىڭ جوق تۇستارىن سالۋى ءۇشىن Crop قۇرالىنىڭ Content-Aware دەپ اتالاتىن باپتاۋىن قوسۋ كەرەك، وسىدان كەيىن گرافيكالىق رەداكتور قاجەتتى ولشەمگە دەيىن سۋرەتتى ءوزى تولىقتىرىپ سالادى.