استانالىقتار وليمپيادا كۇنىن اتاپ وتۋدە

استانا. قازاقپارات - استاناداعى پاركتە قالا تۇرعىندارى مەن ەلوردا قوناقتارى وليمپيادا كۇنىن مەرەكەلىك شارالارمەن اتاپ وتۋدە.

ايتا كەتەيىك، وليمپيادا كۇنى ەلىمىزدە جىل سايىن ءداستۇرلى تۇردە كەڭ كولەمدە اتالىپ وتەتىن مەرەكەلىك شارانىڭ بىرىنە اينالىپ كەلەدى. ايتۋلى كۇندى مەرەكەلەپ، جاياۋ جۇگىرىستەن، باسقا سپورت ويىندارىنان ءوز كۇشىن سىناپ كورۋ ءۇشىن جاس مولشەرىنە قاراماستان كەز- كەلگەن ادام قاتىسا الادى. بۇل ءۇشىن ءارتۇرلى جاستاعىلارعا ارنالىپ جەكە جۇگىرىستەر ۇيىمداستىرىلادى. مۇمكىندىگى شەكتەۋلى قاتىسۋشىلارعا ارنايى جۇلدەلەر تاعايىندالادى.

 بيىل دا داستۇرگە سايكەس، ەلوردا تۇرعىندارى مەن قوناقتارى ءتۇرلى سپورتتىق شاراعا قاتىستى، سونىڭ ىشىندە 60 جانە 100 مەتر قاشىقتىققا جۇگىرۋ، ميني- فۋتبول، ۇلكەن جانە ۇستەل تەننيسى، ارقان تارتىس، دارتس ويىنى جانە دوپتى باسكەتبول سەبەتىنە ءتۇسىرۋ ويىندارى ۇيىمداستىرىلعان.

 ءتىپتى ەڭ جاس قاتىسۋشىلاردىڭ ءوزى بۇندا وليمپيادا تاقىرىبىنداعى سۋرەتتەر كونكۋرسىنا قاتىسۋدا. مەرەكەنىڭ باستى شارالارىنىڭ ءبىرى وعان كەلۋشىلەر ريو- دە- جانەيرودا وتەتىن وليمپيادا ويىندارىنا قاتىساتىن قازاقستان سپورتشىلارىنا دەگەن اقجارقىن تىلەكتەرىن جازىپ قالدىرۋ ءۇشىن ارنايى ستەند ۇيىمداستىرىلعان.

مادەنيەت جانە سپورت ءمينيسترى ارىستانبەك مۇحامەدي ۇلى ءوز سوزىندە جانكۇيەرلەردىڭ قولداۋى شىن مانىندە ەل سپورتشىلارىنىڭ ناتيجەسىنە ۇلكەن سەپتىك بولاتىنىن اتاپ ءوتتى. ال وليمپيادا ويىندارىنا قاتىساتىن بوكسشى يۆان دىچكو: ء«وز كەزەگىندە ءبىز دە قازاقستاننىڭ جالاۋى وليمپيادا ويىندارىنىڭ تۇعىرىنان ءجيى كوتەرىلۋىنە بارىمىزدى سالامىز» ، دەپ اتاپ ءوتتى.

 ەسكە سالا كەتەيىك، قازىرگى ۋاقىتتا 2016 -جىلعى جازعى وليمپيادا ويىندارىنا قاتىسۋعا قۇقىق بەرەتىن قازاقستاننىڭ قورجىنىندا 86 وليمپيادا جولداماسى بار.

اۆتور: قانات مامەتقازى ۇلى