الماتىدا بوكستان وليمپيادا چەمپيونى ەرماحان ىبىرايىموۆ شەبەرلىك سىنىبىن وتكىزدى
وعان بوكسقا قىزىعۋشىلىق تانىتىپ جۇرگەن بەس جاستان جوعارى بالالار، جاسوپىرىمدەر جانە ەرەسەكتەر قاتىستى.
سپورت كەشەنىنە كەلگەن بوكستان ماسكەۋ وليمپياداسىنىڭ كۇمىس جۇلدەگەرى، AIBA ۆيتسە- پرەزيدەنتى، ازيا بوكس كونفەدەراتسياسىنىڭ پرەزيدەنتى سەرىك قوناقبايەۆ پەن ەرماحان ىبىرايىموۆتى الماتىلىق جاستار زور قۋانىشپەن قارسى الدى.
كەيىن، بوكسقا ارنالعان ەكى زالدا شەبەرلىك سىنىپتارى باستالدى. سەرىك قوناقبايەۆ اسپالى تۇلىپتار ىلىنگەن زالدا بالالار مەن جاسوسپىرىمدەرگە قالاي دۇرىس سوققى جاساۋ ادىستەرىن ۇيرەتسە، ەرماحان ىبىرايىموۆ شارشى الاڭدا بوكسقا قاجەتتى جاتتىعۋلاردى، قيمىل- قوزعالىستاردى، سوققىلاردى قالاي جاساۋ ادىستەرىن كورسەتتى. ەسىمدەرى الەمگە تانىلعان، حالقىمىزدىڭ ماقتانىشىنا اينالعان ەكى بىلعارى قولعاپ شەبەرى بالالارمەن بىردەن ءتىل تابىسىپ، ولاردىڭ قويعان سۇراقتارىنا ريزا كوڭىلمەن جاۋاپ بەرىپ جاتتى. ال شەبەرلىك سىنىبىنا قاتىسۋشىلاردىڭ بارلىعى اتاقتى بوكسشىلاردىڭ ءاربىر قيمىل- قوزعالىسىن قالت جىبەرمەي باقىلاپ، ايتقان اقىل- كەڭەستەرىن زەيىن قويىپ تىڭدادى جانە كورگەن- بىلگەندەرىن كەيىن ءىس جۇزىندە جۇزەگە اسىرۋعا تىرىستى. ءبىر ساعاتتان استام ۋاقىتقا سوزىلعان شەبەرلىك سىنىبىنان كەيىن «قازاقپارات» ءتىلشىسى دە وليمپيادالىق دايارلىق ورتالىعىنىڭ جەتەكشىسىنە بىرنەشە سۇراق قويىپ ۇلگەردى.
- ەرماحان، بۇگىن تۇڭعىش رەت SK Boxing سپورت كەشەنىندە اشىق ەسىك كۇنى اياسىندا بوكستان شەبەرلىك سىنىبىن وتكىزدىڭىز. بالالار مەن جاسوسپىرىمدەردىڭ ىنتا- ىقىلاسى قالاي بولدى؟
- بالالاردىڭ ىقىلاسى وتە زور بولدى. ءتىپتى اتا- انالارىن ەرتىپ بەس جاستاعى بالالار دا كەلىپتى. بارلىعى زەيىن قويىپ تىڭدادى، مەنىڭ جاساعان قيمىل- قوزعالىستارىمدى قالت جىبەرمەي، بۇلجىتپاي قايتالاۋعا تىرىستى. مەن بالالاردىڭ كوزىنەن بوكسقا دەگەن زور قىزىعۋشىلىقتىڭ بار ەكەندىگىن كورىپ ريزا بولدىم. سوندىقتان، بۇل اشىق كۇنى شاراسىنا قاتىسقانىما قۋانىشتىمىن. ەگەر دە وسى بالالاردىڭ ىشىنەن بولاشاقتا ەل نامىسىن قورعايتىن مىقتى سپورتشىلار جانە ودان قالا بەردى سالاماتتى ءومىر سالتىن ۇستاناتىن ءبىلىمدى، پاتريوت ازاماتتار شىعىپ جاتسا ارمانىمنىڭ ورىندالعانى. ويتكەنى، ءبىزدىڭ باستى ماقساتىمىز - ءبىرىنشى كەزەكتە جاستارعا ۇلتتىق، وتانسۇيگىشتىك رۋحتا دۇرىس تاربيە بەرۋ، سودان كەيىن سپورتقا باۋلۋ.
- ەرماحان، الماتىدا كەڭەس وداعىنىڭ باتىرى، حالىق قاھارمانى، ارميا گەنەرالى ساعادات نۇرماعامبەتوۆتى ەسكە الۋعا ارنالعان ⅩⅩ حالىقارالىق تۋرنير ءوتىپ جاتىر. وتاندىق بوكسشىلاردىڭ اياق الىسى قالاي؟
- اياق الىسى جاقسى. بۇل وتە ماڭىزدى تۋرنير. ويتكەنى، بۇل بوكستان قازاقستان قۇراما كومانداسى ءۇشىن ريو وليمپياداسى الدىنداعى سوڭعى جارىس. سوندىقتان، مۇندا جانىبەك ءالىمحان ۇلى، ءبىرجان جاقىپوۆ، بەرىك ءابدىراحمانوۆ سەكىلدى بوكسشىلارىمىز ونەر كورسەتىپ جاتىر. وسى تۋرنيردەن كەيىن، بىلعارى قولعاپ شەبەرلەرىمىز ارنايى وقۋ- جاتتىعۋ جيىندارىن وتكىزىپ بولعان سوڭ، تامىز ايىندا ريو وليمپياداسىنا اتتانادى.
- ەرماحان، لوندون وليمپياداسىنان كەيىن، بوكستان ۇلتتىق كوماندانىڭ قۇرامى قانشالىقتى وزگەردى؟
- قازىر، بوكستان قازاقستاننىڭ ۇلتتىق قۇراما كومانداسىنىڭ قۇرامى 60 پايىزعا جاڭاردى دەپ ويلايمىن. مىسالى، لوندون وليمپياداسىنىڭ چەمپيونى سەرىك ساپيەۆ قازىر اكىمشىلىك قىزمەتتە ءجۇر. الايدا، سول وليمپياداعا قاتىسقان يۆان دىچكو، ادىلبەك نيازىمبەتوۆ، دانيار ەلەۋسىنوۆ سەكىلدى تاجىريبەلى بوكسشىلارىمىز كوماندا قۇرامىندا قالدى. ولاردىڭ قاتارىنا جانىبەك ءالىمحان ۇلى، ابىلايحان ءجۇسىپوۆ سەكىلدى جاستارىمىز كەلىپ قوسىلدى. ەندى، ريو وليمپياداسىندا كوماندا كاپيتانى، 69 كەلى سالماق دارەجەسىندە ونەر كورسەتەتىن دانيار ەلەۋسىنوۆ التىن الادى دەگەن سەنىمدەمىز. ءقازىر، جىگىتتەرگە بارىنشا كومەكتەسىپ جاتقان جايىمىز بار. كەيدە، ارتىق كەتىپ قالمايىق دەپ تە قورقامىز. ەگەر، مەنىڭ بولجامىم بويىنشا ريو وليمپياداسىندا 1 التىن، 1 كۇمىس، 1 قولا مەدال الىپ جاتساق، نۇر ۇستىنە نۇر دەپ ويلايمىن.
- اڭگىمەڭىزگە راحمەت.
ايتا كەتەلىك، SK Boxing سپورت كەشەنىندە بوكستان باسقا، زاماناۋي بيلەر، دۇرىس تاماقتانۋ بويىنشا دا شەبەرلىك سىنىپتارى جانە قىزىقتى بايقاۋلار ۇيىمداستىرىلدى.
ال، SK Boxing سپورت كەشەنى اتاقتى بوكسشى سەرىك قوناقبايەۆتىڭ ەسىمىمەن تىكەلەي بايلانىستى. مۇندا سەرىك كەرىمبەك ۇلى باسقا دا اتاقتى بوكسشىلارمەن بىرگە تۇراقتى تۇردە شەبەرلىك سىنىپتارىن وتكىزىپ تۇرادى.
اۆتور: ايبوتا جاپپاربەرگەن
