قازاقتىڭ ءان-تەرمەسىن ايتىپ جۇرگەن ورىس قىزى تاتيانا اقتوبەدە كونسەرت بەردى
ماماندىعى پسيحياتر دارىگەر تاتيانا بۋرميستروۆانىڭ ءوزىنىڭ ايتۋىنشا، وڭتۇستىك قازاقستان وبلىسىنىڭ العاباس اۋىلىندا ورىس وتباسىندا تۋىپ-وسكەن وعان قالىڭ قازاقتىڭ ىشىندە ءجۇرىپ، ءتىلدى مەڭگەرۋ قيىنعا سوقپاعان، سول سياقتى مۋزىكاعا دەگەن قىزىعۋشىلىق ونىڭ 7 جاسىنان دومبىرا ۇيرەنۋگە دەگەن ىقىلاسىن وياتقان. اۋىلداعى مۋزىكالىق ساۋاتى بار ۇلبيكە دەگەن قىزدان قۇرمانعازىنىڭ ءبىر كۇيىن ۇيرەنگەن. الماتىداعى مەديتسينا ينستيتۋتىندا وقىپ جۇرگەندە رەسپۋبليكالىق «التىباقان»، «تاماشا» سياقتى تەلەحابارلارعا ءتۇسىپ، ءانشى رەتىندە تانىلعان.
اقتوبەگە 16 جىلدان بەرى كەلىپ تۇرعانى ەكەن.
وبلىستىق تىلدەردى دامىتۋ باسقارماسىنىڭ شاقىرۋىمەن كەلگەن قازاقستاننىڭ ەڭبەك سىڭىرگەن مادەنيەت قىزمەتكەرى، قازاقتىڭ حالىق اندەرى مەن تەرمەلەرىن ورىنداۋشى تاتيانا بۋرميستروۆا 25 -مامىر كۇنى العا قالاسىندا، 26 -مامىردا مارتوك سەلوسىندا، ال 27 -مامىردا ع. جۇبانوۆا اتىنداعى وبلىستىق فيلارمونيادا كونسەرت بەردى.
- وسىدان قىرىق جىل بۇرىن 1976 -جىلى حالىق مەنى «التىباقان» تەلەحابارى ارقىلى ءانشى دەپ تانىپ ەدى، ودان بەرى دە 40 جىل ءوتىپتى. ءوز ماماندىعىم بويىنشا 7 جىل عانا قىزمەت جاسادىم. ءبىر اقساقالدىڭ: «شىراعىم، ءبىزدىڭ ءتانىمىزدى ەمدەيتىن دارىگەر تابىلار، سەن جاقسى اندەرىڭمەن ءبىزدىڭ جانىمىزدى ەمدە»، - دەگەنى ەسىمدە. تىڭدارماندارىما ءانشى تاتيانا رەتىندە كوبىرەك قاجەت بولدىم. «تاماشاعا» ءۇش تاتيانا بولىپ قازاقتىڭ ءانىن ايتىپ شىققاندا، حالىق سونشا ريزا بولدى. ءبىز تۋرالى فيلم دە ءتۇسىرىلدى. تالدىقورعاندىق تاتيانا پولتاۆسكايا بۇگىندە ماسكەۋدە تۇرادى، ال تارازدىق تاتيانا مارتىنەنكو بايانمەن ولەڭ ايتاتىن، ەكەۋى دە كاسىبي مۋزىكا ماماندارى، كەيىن ءبىراق انشىلىكتى جالعاستىرعان جوق. دومبىرامدى تاستاماي، قازاقتىڭ ءان- تەرمەسىن جانىما سەرىك ەتىپ، ءالى كۇنگە ءانىمدى ايتىپ كەلەمىن. جەكە كونسەرتتەرىمدى ءوزىم جۇرگىزەمىن، ءار كونسەرتتە اۋديتورياعا قاراي اڭگىمەلەرىمدى، اندەرىمدى ىرىكتەپ ايتامىن. رەپەرتۋارىمدا قازاقتىڭ حالىق اندەرى، بۇرىنعى كومپوزيتورلاردىڭ شىعارمالارى، وسيەت رەتىندە ايتىلاتىن تەرمەلەر بار. بۇرىن تۇرمىستىق دەڭگەيدەگى ءتىلدى بىلسەم، قازىر قازاقشا كوسىلىپ سويلەي الامىن، ول قازاق پوەزياسىن كوپ وقىعانىمنىڭ جەمىسى دەپ ويلايمىن، - دەيدى تاتيانا.
ارداق قوناقبايەۆا
