جەر رەفورماسى جونىندەگى كوميسسيا كەلەسى اپتادان باستاپ وڭىرلەردە كوشپەلى وتىرىس وتكىزەدى - ب. ساعىنتايەۆ
كوميسسيا شەشىمىمەن كەلەسى كوشپەلى وتىرىس اقمولا وبلىسىندا وتەتىن بولىپ بەلگىلەندى.
«ءبىر قۋانتارلىعى، كوميسسيا بارىسىندا ايتىلعان ورتاق ويدىڭ ءتۇيىنى ءبىر عانا ماسەلەگە سايادى - بۇل ەلدىڭ بىرلىگى، تۇتاستىعى مەن تاتۋلىعى. وسىنى ءاردايىم ەستەن شىعارمايىق. قانداي تالاس بولسا دا، ونىڭ اقىرى نەگە اپاراتىنىن ءوزىمىز ءبىلىپ وتىرۋعا ءتيىسپىز»، دەدى جيىندى قورىتىندىلاعان ۇكىمەت باسشىسىنىڭ ورىنباسارى، كوميسسيا ءتوراعاسى باقىتجان ساعىنتايەۆ.
ونىڭ ايتۋىنشا، ەندىگى وزەكتى ماسەلە جەرگىلىكتى حالىقتىڭ پىكىرىن ءبىلىپ، تىلدەسۋ ءۇشىن وڭىرلەرگە ساپار جاساۋ. «ءبىز وسى ساپارعا وبلىس اكىمدەرىن شاقىرايىق دەدىك. كەيبىرەۋلەر پرەمەر-ءمينيستردى شاقىرتۋ تۋرالى ۇسىنىس جاساپ جاتىر. ءوستىپ ءجۇرىپ نە ءۇشىن جينالعانىمىزدى ۇمىتىپ قالاتىن سەكىلدىمىز. بارا-بارا ەلباسىن شاقىرايىق دەۋىمىز مۇمكىن. سوندىقتان دا، كوميسسيانىڭ جۇمىسى بيلىكتەگىلەردىڭ ەسەبىن تىڭداۋ ەمەس، جەر رەفورماسىنا قاتىستى بارلىق تاراپتىڭ پىكىرىن تىڭداپ، سونى تالداپ، پارلامەنتكە ۇسىنىس وتكىزۋ»، دەدى ب. ساعىنتايەۆ.
جيىندى قورىتىندىلاعان كوميسسيا ءتوراعاسى كەلەسى اپتادا كوشپەلى وتىرىستىڭ اقمولا وبلىسىندا وتكىزىلەتىنىن جەتكىزىپ، ول بويىنشا ءتىزىم جاسالاتىنىن اتاپ ءوتتى. «مۇمكىن وتىرىستى جالعىز كوكشەتاۋدا ەمەس، شورتاندىدا، ەرەيمەنتاۋدا دا وتكىزگەن دۇرىس شىعار. بالكىم ول ءۇشىن ءبولىنىپ كەزدەسەرمىز. ەڭ باستىسى حالىق پىكىرىن جيناقتايىق»، - دەدى كوميسسيا جەتەكشىسى.
اۆتور: قانات مامەتقازى ۇلى
