اتامبايەۆ: قىرعىزستان كەز-كەلگەن جاۋدان ءوزىن قورعاي الادى
«بىزگە بوتەننىڭ جەرى كەرەك ەمەس. بىرەۋگە شابۋىلداۋ نەمەسە جەرىن باسىپ الۋ نيەتىمىز دە جوق. ەگەر كىمدە-كىم وسىنداي نيەتپەن كەلەتىن بولسا، ولارعا لايىقتى تويتارىس بەرۋ ءۇشىن كۇش-قۋاتىمىز جەتكىلىكتى»، - دەپ ءمالىم ەتتى قىرعىزستان پرەزيدەنتى المازبەك اتامبايەۆ.
ونىڭ ايتۋىنشا، الەمنىڭ بارلىق ەلدەرىنە، ونىڭ ىشىندە ورتالىق ازيا اۋماعىنا لاڭكەستىك پەن ەكسترەميزمنىڭ قاۋپى ءتونىپ تۇر. سونىمەن بىرگە ايماقتا ەتنيكاارالىق، جەر، سۋ جانە شەكارا ماسەلەسى وزەكتى بولىپ وتىر.
«كەيبىر ساراپشىلار «بۇل ماسەلەلەردىڭ ارتى داۋ-دامايعا ۇلاسادى» دەۋدەن جالىقپايدى. ول ازداي كەيبىر مەملەكەت باسشىلارى «جەر جانە سۋ داۋىنىڭ سوڭى سوعىسقا اكەپ سوعادى» دەپ مالىمدەدى. مۇنداي جاعدايدا قارۋلى كۇشتەر وتاندى جاۋدان قورعاۋعا دايىن بولىپ، زۇلىم كۇشتەرگە، جەرىمىزگە كەز-كەلگەن باسقىنشىلىقتارعا قارسى تۇرۋى ءتيىس» - دەپ جازىلعان قىرعىزستان باسشىسىنىڭ قۇتتىقتاۋ سوزىندە.
قىرعىز پرەزيدەنتى تاۋەلسىز قارۋلى كۇشتەر قالىپتاسۋ جىلدارىندا كوپتەگەن قيىندىقتان وتكەنىن، الايدا، قازىر جاعداي تۇبەگەيلى وزگەرگەنىن ايتىپ ءوتتى. ونىڭ سوزىنشە، بۇگىندە قىرعىزستان اسكەرىنىڭ سانى از بولسا دا، زاماناۋي قارۋ-جاراقپەن جاراقتاندىرىلعان.
