ساراپشىلار: جاز ايلارىندا قازاقستاندا باسپانا باعاسى ارزاندايدى
Homsters.kz كومپانياسىنىڭ ساراپشىلارى وسىنداي قورىتىندىعا كەلىپ وتىر دەپ حابارلايدى Skifnews.kz باسىلىمى.
ساراپشىلاردىڭ ايتۋىنشا، جىل باسىنان بەرى قايتالاما تۇرعىن ءۇي نارىعىنداعى ۇسىنىستار سانى ورتا ەسەپپەن %30 عا ارتقان، ال سۇرانىس، كەرىسىنشە، كەرى ديناميكا كورسەتىپ وتىر. بۇل ءۇي ساتۋشىلاردى وبەكتىلەر قۇنىن قايتا قاراستىرۋعا ماجبۇرلەدى.
«وتكەن جىلدىڭ ورتاسىنان باستاپ ولار ۆاليۋتا بالاماسىنداعى شىعىننىڭ ورنىن تولتىرۋ ءۇشىن جىلجىمايتىن مۇلىكتەرىن ساۋداعا شىعارماي كەلگەن بولاتىن، ال قازىر تەڭگە باعامىنا قاتىستى جاعدايعا مويىنسۇنىپ، ءۇي باعاسىن تومەندەتۋگە دايىن وتىر. ساتىپ الۋشىلار بولسا نارىقتاعى باعانىڭ بارىنشا تومەندەگەنىن كۇتەتىن سەكىلدى»، - دەپ اتاپ ءوتتى Homsters.kz كومپانياسىنىڭ ساتۋ جونىندەگى ديرەكتورى ەكاتەرينا لادىجەنسكايا.
كوپ جاعدايدا قانداي دا ءبىر جۇمىس باياۋلايتىن جاز كەزىندە جوعارىدا اتالعان جاعدايدىڭ قالىپتاسۋى مەن ساتۋشىلار جانە ساتىپ الۋشىلار كوڭىل-كۇيىنىڭ سايكەس كەلمەۋى قايتالاما تۇرعىن ءۇي نارىعىنداعى باعالاردىڭ قوسىمشا تومەندەۋىنە اكەلۋى مۇمكىن دەپ سانايدى Homsters.kz ساراپشىسى.
ناۋرىز ايىندا قازاقستاننىڭ ەڭ ءىرى قالاسى الماتىدا قايتالاما نارىقتاعى ءبىر شارشى مەتردىڭ باعاسى اقپان ايىمەن سالىستىرعاندا %15,8 عا تۇسكەنىن ەسكە سالا كەتەيىك. ءساۋىر ايىندا باعانىڭ تومەندەۋى ايتارلىقتاي باياۋلاپ، شامامەن %4 دى قۇرادى. مامىردا الدىڭعى ايلارمەن سالىستىرعاندا ءبىر شارشى مەتر قۇنى بار بولعانى %1,7 عا ارزاندادى.
Homsters.kz ساراپشىلارىنىڭ پىكىرىنشە، جاڭا ۇيلەر نارىعىندا كەيبىر قۇرىلىس كومپانيالارى ماۋسىمدىق فاكتورلار ىقپالىنىڭ ورنىن تولتىرۋ ءۇشىن جارناما ناۋقاندارى جانە اكتسيالىق ۇسىنىستار كومەگىمەن ساتىپ الۋشىلاردى قىزىقتىرۋعا تىرىساتىن بولادى. اتالعان سەكتورداعى وبەكتىلەر مەن ۇسىنىستار سانى ارتادى.
«ۇلتتىق ۆاليۋتا باعامىنىڭ وزگەرىسكە تۇسكەنىنە قاراماستان، ديەۆەلوپەرلەر جاڭا جوبالارعا دەگەن قىزىعۋشىلىقتارىن جوعالتقان جوق جانە تۇرعىن ءۇي، ساۋدا ءھام كوممەرتسيالىق مۇلىكتىڭ باسىن قوساتىن ءىرى ينفراقۇرىلىمدىق جوبالاردى دا قامتيتىن قۇرىلىستارعا رۇقسات الۋلارىن جالعاستىرۋدا»، - دەپ اتاپ ءوتتى ەكاتەرينا لادىجەنسكايا.
مۇنداي تەندەنتسيانى رەسمي ستاتيستيكا دا راستاپ وتىر. ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتتەرى بويىنشا، وسى جىلدىڭ العاشقى ءتورت ايىندا 3,2 ميلليون شارشى مەتر تۇرعىن ءۇي پايدالانۋعا بەرىلگەن ەكەن. ال وتكەن جىلدىڭ بالاما كەزەڭىندە بۇل كورسەتكىش 2,6 ميلليون شارشى مەتردى قۇراعان بولاتىن.
ساراپشىنىڭ سوزىنە قاراعاندا، نارىقتا قۇرىلىس نورمالارىن بۇزۋ جانە وبەكتىلەردى ءوز ۋاقىتىندا پايدالانۋعا بەرمەۋ فاكتورلارى ءالى دە بار، سوندىقتان كليەنتتەر ءۇي تاڭداۋ بارىسىندا ۇسىنىلىپ وتىرعان مۇلىكتىڭ باعاسىنا عانا ەمەس، قۇرىلىس ۇيىمىنىڭ ابىروي- بەدەلىنە دە ءمان بەرەتىن بولعان.
«بۇدان ساتىپ الۋشىلار تاراپىنان ءالى دە ۇلكەن سۇرانىسقا يە بولىپ وتىرعان ەكونوم جانە كومفورت-كلاستى ۇيلەردى سالۋعا ماماندانعان ءىرى ديەۆەلوۆەرلەر ۇتادى. وسىنىڭ ارقاسىندا كوكتەمدە وبەكتىلەرگە دەگەن بۇرىنعى باعانى ساقتاپ قانا قويماي، ساۋدا كولەمىن %10-20 عا ارتتىرا الدى»، - دەپ ءسوزىن قورىتىندىلادى ەكاتەرينا لادىجەنسكايا.
