ب. ساعىنتايەۆ الەۋمەتتىك جەلىلەردە جەر ماسەلەسىن كوتەرىپ جۇرگەندەردى سابىرعا شاقىردى

استانا. قازاقپارات - كوميسسيادان پىكىرلەرمەن ساناسپاي، اقىلعا سالماي، ساراپتاماي بىردەن شەشىم شىعارىڭدار دەپ تالاپ ەتۋ قاتە تۇسىنىك.

بۇل تۋرالى بۇگىن جەر رەفورماسى جونىندەگى رەسپۋبليكالىق كوميسسيانىڭ وتىرىسىندا وسى كوميسسيا ءتوراعاسى، ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ ءمالىم ەتتى.

«سوڭعى كەزدەردە الەۋمەتتىك جەلىلەردە ءبىرقاتار ازاماتتار ءبىزدىڭ كوميسسياعا قاتىستى پىكىرلەرىن ايتىپ جاتىر. وتكەندە ءبىز كوميسسيانىڭ قۇزىرەتتىلىگى قانشالىقتى ەكەنىن اتاپ وتكەن بولاتىنبىز. دەگەنمەن دە كەيبىرەۋلەر «جۇمىس شەشىلمەيدى، ەشتەڭە جاساي المايدى، قاجەتى جوق» دەگەن ويلارىن تاراتۋدا. ءبىز جۇمىسىمىزدى باستاماي جاتىپ، بىزدەن ۇلكەن شەشىم كۇتىپ تۇر. مەنىڭ ويىمشا، بۇل ءبىزدىڭ جۇمىسىمىزعا كىربىڭ كەلتىرۋ، الداعى جۇمىسىمىزدى ارانداتۋ. اتاپ ايتقاندا، ەلباسىنىڭ تاپسىرماسى بويىنشا بۇل كوميسسيا قۇرىلدى. ءبىزدىڭ جارتىجىلدىق ۋاقىتىمىز بار، وسى مەرزىمدە كەلىپ تۇسكەن ۇسىنىستاردى ءبىر جۇيەگە كەلتىرە وتىرىپ، پارلامەنتكە ۇسىنىس جاساۋىمىز كەرەك»، - دەپ توقتالدى ب. ساعىنتايەۆ.

 ونىڭ سوزىنە قاراعاندا، сall-ورتالىققا، سايتقا مىڭداعان حابارلار مەن ۇسىنىستار كەلىپ تۇسۋدە.

 «مەنىڭ اتىما دا كۇندەلىكتى ۇسىنىستار جەتكىزىلۋدە. بۇنداي ۇسىنىستار وسى كوميسسيا مۇشەلەرىنىڭ بارلىعىنا كەلىپ جاتىر دەگەن ويدامىن. الايدا، وسى پىكىرلەرمەن ساناسپاي، اقىلعا سالماي، ساراپتاماي، ءبىر جۇيەگە كەلتىرمەستەن بىردەن شەشىم شىعارىڭدار دەگەن قاتە تۇسىنىك بار. بۇل - ارانداتۋشىلىق. اتقاراتىن جۇمىسىمىزدى ماقساتىنا جەتكىزبەۋ دەپ ەسەپتەيمىن. سول سەبەپتى ول اعايىندارعا ايتارىم: وسىلاي جۇرگەنشە، قايتا ءبىزدىڭ كوميسسياعا كەلسىن. ءبىزدىڭ ەسىگىمىز اشىق، جاريا تۇردە جۇمىسىمىزدى جۇرگىزىپ جاتىرمىز. وسىندا ۇسىنىستارىڭىزدى ايتىڭىزدار!»، - دەدى كوميسسيا ءتوراعاسى.

اۆتور: رۋسلان عابباسوۆ