استانا حالىقارالىق قارجى ورتالىعى ەۋرازيانىڭ قارجى قاقپاسىنا اينالۋ ءۇشىن قۇرىلعان - ن. نازاربايەۆ
بۇل تۋرالى بۇگىن ق ر پرەزيدەنتى جانىنداعى شەتەل ينۆەستورلارى كەڭەسىنىڭ 29- وتىرىسىندا ەلباسى نۇرسۇلتان نازاربايەۆ ايتتى.
«بولاشاققا كوز جۇگىرتە وتىرىپ، ءبىز ا ح ق و- نىڭ قارجىلىق قۇرالدار سالاسىنا ينۆەستيتسيالاردى، كاپيتالداردى، يننوۆاتسيالاردى تارتۋىن كورگىمىز كەلەدى. ول بارشا ەۋرازيا ءۇشىن قارجىلىق قاقپاعا اينالۋ ءۇشىن قۇرىلعان»، - دەدى مەملەكەت باسشىسى.
ەلباسى ءوز سوزىندە استانانىڭ ىسكەرلىك، مادەني جانە عىلىمي ورتالىق رەتىندە داميتىندىعىن، زاماناۋي حالىقارالىق كولىك- لوگيستيكالىق جۇيەگە يە بولاتىندىعىن باسا ايتتى.
«ءبىز توكيو، لوندون، نيۋ-يورك سىندى ونداي ورتالىقتاردى بىلەمىز. ءبىز بۇل رەتتە قولىمىزدى كەش سەرمەپ قالمايتىن شىعارمىز. باستاپقىدا بىزگە مۇنداي ورتالىعى جوق ءوزىمىزدىڭ ءوڭىردى مويىنداتۋىمىز جانە ودان كەيىن بىرتىندەپ بارلىق ءىرى وڭىرلەرگە ءوزىمىزدىڭ مۇمكىنشىلىگىمىزدى پاش ەتۋگە ءتيىسپىز. قارجى ورتالىعىنا حالىقارالىق قاتىسۋشىلاردى تارتۋ ءۇشىن ءبىز پوستكەڭەستىك كەڭىستىكتە 100 پايىز بالاماسى جوق بىرەگەي مۇمكىنشىلىكتەر ۇسىنۋدامىز»، - دەدى ن. نازاربايەۆ.
اۆتور: مارلان جيەمباي
