گرۋزيندىك «بالا- شاعادان» شارشاعان بوكسشى ەندى گولوۆكيندى سۇلاتپاقشى
- الۆارەستىڭ WBC بەلبەۋىنەن باس تارتۋىنا نە سەبەپ بولدى ەكەن؟ ونىڭ گولوۆكيننەن قورىققانى راس پا، قالاي ويلايسىز؟
- مەن الۆارەس گولوۆكيننەن قورىقتى دەپ ويلامايمىن. ەگەر دە ول جەكپە-جەككە شىققىسى كەلمەسە، دەمەك، وعان از اقشا ۇسىنعان.
- ال سىزدە الۆارەسپەن كەزدەسۋگە مۇمكىندىك تۋىپ جاتسا، قانشا اقشا ۇسىنار ەدىڭىز؟
- بۇل جەردە ماسەلە - تەلەارنانىڭ بۇل كەزدەسۋدى كورسەتۋگە مۇددەلى ەكەندىگىنە تىكەلەي بايلانىستى. دەگەنمەن، مەن الۆارەستىڭ گولوۆكيندى جەڭەتىندەي قاۋقارى بار دەپ ويلامايمىن.
- ال سىزدىڭشە، گولوۆكيندى جەڭۋگە كىمنىڭ شاماسى جەتەدى؟
- تەك گرۋزين اۆتانديل حۋرتسيدزەنىڭ شاماسى جەتەدى (كۇلىپ). شىنىمدى ايتسام، گولوۆكينمەن جەكپە-جەك وتكىزۋگە كەت ءارى ەمەسپىن. تەك، بۇل كەزدەسۋگە دايىندالۋعا ءبىرشاما ۋاقىت كەرەك. ءتىپتى، گولوۆكيننىڭ ءوزى ءار جەكپە-جەگىنە ءۇش ايداي دايىندالادى. بۇل جولى وعان لايىقتى قارسىلاس تابىلماسا، قايتادان ءبىر «قاڭباقتى» قارسى شىعارا سالۋى ابدەن مۇمكىن. وعان سوڭعى كەزدەسۋىندە وزدەرىڭىزدىڭ كوزدەرىڭىز جەتكەن بولار. ۋەيد گولوۆكين ءۇشىن تىم وسال قارسىلاس. ال مەنىڭ ءجونىم بولەك.
- دەمەك، ءدال قازىر گولوۆكينگە لايىقتى قارسىلاس تابۋ قيىن دەگىڭىز كەلىپ وتىر ما؟
- نەگىزى، كەز كەلگەن مىقتىنى جەڭۋگە بولادى. بۇل - بوكس. ءبىر عانا سوققى بۇكىل جەكپە- جەكتىڭ تاعدىرىن شەشىپ كەتۋى مۇمكىن. سوندىقتان تىم اسىرا سىلتەي بەرۋگە بولمايدى. تاعى ءبىر ايتار نارسە - گولوۆكين ءالى كۇنگە سوققىسى مىعىم بوكسشىمەن كەزدەسكەن جوق. بالكىم، گولوۆكيننىڭ كەلەسى قارسىلاسى مەن بولارمىن. مەن قازىرگى كەزدە وزىمە گولوۆكيننەن وزگە لايىقتى قارسىلاستى كورىپ وتىرعانىم جوق. جاستاردى ساباي بەرىپ وبال بولدى. ەندىگى جەردە ناعىز مىقتىمەن كەزدەسكىم كەلەدى.
ايتا كەتەيىك، بۇعان دەيىن گرۋزيالىق بوكسشىنىڭ باپكەرى اندرە روزە قىركۇيەك ايىندا وتانداسىمىزبەن جەكپە- جەك ۇيىمداستىرعىسى كەلەتىنىن مالىمدەگەن. الايدا، ءقازىر گولوۆكيننىڭ كومانداسى كەلەسى كەزدەسۋگە گرۋزيالىقتان وزگە ورتا سالماقتاعى بىرنەشە مىقتىنىڭ كانديداتۋراسىن قاراستىرىپ جاتىر.
