قاراعاندىلىق وقۋشى قىز ا ق ش- تىڭ اتاقتى ۋنيۆەرسيتەتىنىڭ وقۋ گرانتىن ۇتىپ الدى

استانا. قازاقپارات - قاراعاندىلىق وقۋشى بويجەتكەن ا ق ش- تىڭ اتاقتى پرينستون ۋنيۆەرسيتەتىنىڭ وقۋ گرانتىن ۇتىپ الدى دەپ حابارلايدى «استانا» ارناسى.

ايجان احمەتجانوۆا الەمگە ايگىلى ۇزدىك ءۇش وقۋ ورنىنىڭ بىرىندە ءتورت جىل بويى تەگىن وقي الادى. ول «قالا قۇرىلىسىنىڭ ينجەنەرياسى» ماماندىعى بويىنشا العان ءبىلىمىن ءوز وتانىنىڭ پايداسىنا اسىرۋدى جوسپارلاپ وتىر.

نازاربايەۆ ينتەللەكتۋالدىق مەكتەبىنىڭ تۇلەگى - نيۋ-دجەرسي شتاتىندا ورنالاسقان ايگىلى ۋنيۆەرسيتەتتىڭ گرانتىن ۇتىپ العان العاشقى قازاقستاندىق.

ايجان 3  جىل بويى تىنباي ەڭبەكتەنگەنىن ايتادى. اعىلشىن ءتىلى مەن ماتەماتيكا، فيزيكا پاندەرىنەن بىرنەشە قيىن سىناقتاردان وتكەن.

ناتيجەسىندە ا ق ش- تا وقىسام دەگەن ماقساتىنا قول جەتكىزدى. كەشىكپەي اناسىمەن بىرگە ا ق ش- قا اتتانادى. بولاشاق ستۋدەنت «قالا قۇرىلىسى» سالاسىن زەرتتەپ، عىلىم دوكتورى اتانۋدى ارماندايدى. ەكولوگيالىق تازا ۇيلەر تۇرعىزىپ، قازاق ەلدى مەكەندەرىن كوركەيتكىسى كەلەدى.

«مەن قازاقستاندا شاعىن اۋىل سالۋدى ارماندايمىن. ول جاڭالانىپ وتىراتىن، ءبىزدىڭ كليماتىمىزعا قولايلى قۋات كوزدەرىمەن كۇن كورەتىن بولادى. ءبىزدىڭ ەلدە قۇرىلىستار ءالى سالىنىپ بىتكەن جوق. سوندىقتان العان ءبىلىمىمدى ءوز جەرىمدە جۇزەگە اسىرىپ، پايدامدى تيگىزەم دەپ ويلايمىن»، - دەيدى قاراعاندى قالاسىنداعى نازاربايەۆ ينتەللەكتۋالدىق مەكتەبىنىڭ تۇلەگى ايجان احمەتجانوۆا.