اتىراۋدا سوت شەشىمىمەن يتاليا ازاماتى قازاقستاننان شىعارىلدى

استانا. قازاقپارات - اتىراۋ قالالىق سوتىمەن يتاليا رەسپۋبليكاسىنىڭ ازاماتى سيداگني فلاۆيوني قازاقستان رەسپۋبليكاسىنىڭ زاڭناماسىن بۇزعانى ءۇشىن قازاقستان رەسپۋبليكاسىنىڭ شەگىنەن تىس شىعارىپ جىبەرۋ تۋرالى ازاماتتىق ءىسى قارالدى.

سوت وتىرىسى بارىسىندا يتاليانىڭ ازاماتى ف. سيداگني قازاقستان رەسپۋبليكاسىنىڭ قىلمىستىق كودەكسىنىڭ 259-بابىنىڭ 3- بولىگىنىڭ «ب»، «ۆ» تارماقتارىندا (ەسكى رەداكتسيادا) كوزدەلگەن قىلمىستىق ءىس ارەكەتتەر جاساعان.

اتىراۋ وبلىسىنىڭ قىلمىستىق ىستەر جونىندەگى اۋدانارالىق سوتىنىڭ 14- قىركۇيەك 2010-جىلعى ۇكىمىمەن قازاقستان رەسپۋبليكاسىنىڭ قىلمىستىق كودەكسىنىڭ 259-بابىنىڭ 3- بولىگىنىڭ «ب»، «ۆ» تارماقتارىنا كوزدەلگەن قىلمىستى جاساعانى ءۇشىن كىنالى دەپ تانىلىپ، وعان وسى كودەكستىڭ 55-بابىن قولدانىپ، 6 جىل مەرزىمگە باس بوستاندىعىنان ايىرۋ جازاعا، جازانى تۇزەۋ كولونيانىڭ قاتاڭ رەجيمىندە وتەۋگە سوتتالعان، مەرزىمىنىڭ باستالۋى 2010-جىلدىڭ 20- ساۋىرىنەن باستاپ ەسەپتەلگەن.

اتىراۋ وبلىسىنىڭ قىلمىستىق ىستەر جونىندەگى اۋدانارالىق سوتىنىڭ 1- تامىز 2014-جىلعى قاۋلىسىنىڭ نەگىزىندە ف. سيداگني سوت تاعايىندالعان جازادان مەرزىمىنەن بۇرىن 1 جىل 8 اي 18 كۇنگە شارتتى تۇردە بوساتىلعان.

اتالعان ۋاقىتتان بەرى ف. سيداگني اقتاۋ قالاسىنا بارىپ، جۇمىس جاساعان، 2016-جىلدىڭ 19- ساۋىرىندە جازاسىنىڭ مەرزىمى اياقتالعاننان كەيىن اتىراۋ قالاسىنا كەلىپ، ميگراتسيالىق پوليتسيادان ەلىنە كەتۋ ءۇشىن ۆيزانى رەسىمدەۋگە كەلگەن، الايدا ف. سيداگنيدىڭ سوتتىلىعى جويىلماعان، ول قازاقستان رەسپۋبليكاسىنىڭ حالقىنىڭ دەنساۋلىعىنا، ادامگەرشىلىگىنە قارسى اۋىر قىلمىس جاساعان.

قازاقستان رەسپۋبليكاسىنىڭ «شەتەلدىكتەردىڭ قۇقىقتىق جاعدايى تۋرالى» زاڭىنىڭ 28 بابىنىڭ ۆ) تارماقشاسىنا سايكەس، شەتەلدىك ەگەر ول قازاقستان رەسپۋبليكاسىنىڭ زاڭناماسىن بۇزسا قازاقستان رەسپۋبليكاسىنىڭ شەگىنەن شىعارىلۋى مۇمكىن.

وسى نەگىزدە سوتپەن زاڭ تالاپتارىنا سايكەس يتاليانىڭ ازاماتى سيداگني فلاۆيوني قازاقستان رەسپۋبليكاسىنىڭ شەگىنەن تىس شىعارىلىپ، وعان رەسپۋبليكاسى اۋماعىنان كەتۋگە 15 كۇن مەرزىم ۋاقىت بەرىلدى.

شەشىم زاڭدى كۇشىنە ەندى، دەپ حابارلايدى وبلىستىق سوتتىڭ باسپا ءسوز قىزمەتىنەن.