ءاربىر ەلدىڭ ۇلتتىق دەڭگەيدە اۋقىمدى رەفورمالار جۇرگىزۋى ماڭىزدى - ن. نازاربايەۆ

استانا. قازاقپارات - ءاربىر ەلدىڭ ۇلتتىق دەڭگەيدە اۋقىمدى قۇرىلىمدىق رەفورمالار جۇرگىزۋى ماڭىزدى.

بۇگىن استانا ەكونوميكالىق فورۋمىنىڭ پلەنارلىق سەسسياسىندا ءسوز الا وتىرىپ، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ وسىنداي پىكىرىن ايتتى.

«ارينە، ءاربىر ەلدىڭ ۇلتتىق دەڭگەيدە اۋقىمدى قۇرىلىمدىق رەفورمالار جۇرگىزۋى ماڭىزدى. قىمباتتى دوستار، قازاقستان ءتىپتى كارتادا شەكاراسى جوق بولعان جاس مەملەكەت. بيىل ەگەمەندىگىمىزدىڭ 25 جىلدىعىن تويلايمىز. تاريح ءۇشىن جىلت ەتكەن ءبىر ساتكە تەڭ شيرەك عاسىر ۋاقىتتا ءبىز كارتادا شەكاراسى جوق مەملەكەتتەن الەمنىڭ باسەكەگە قابىلەتتى ەلۋ ەكونوميكاسىنىڭ قاتارىنان تابىلعان مەملەكەتكە اينالدىق. وسى ۋاقىت ىشىندە دامىماعان ەكونوميكالىق جۇيەدەن اشىق نارىقتىق ەكونوميكاعا اينالدىق. بۇل وزگەرىستەر ارينە قيىن بولدى، ءبىراق، ءبىزدىڭ ەل ءۇشىن پايدالى وزگەرىستەر ەدى. الدا اتقارار جۇمىس تا كوپ. تاۋەلسىزدىكتىڭ تاڭى ەندى اتقاندا قازاقستاننىڭ وسىنداي جەتىستىككە جەتەتىنىنە سەنگەندەر از ەدى...»، - دەدى مەملەكەت باسشىسى ن. نازاربايەۆ.

«قازاقستاننىڭ ينستيتۋتتارى مەن ەكونوميكاسىن ءىس جۇزىندە نىعايتۋ وڭايعا سوقپادى. ونى تۇسىنەسىزدەر دەپ ويلايمىن. ءبىز جۇرگىزگەن رەفورمالاردىڭ باستى ناتيجەسى - حالقىمىزدىڭ ءال- اۋقاتى جاقساردى. تاۋەلسىزدىك جىلدارىندا دوللارمەن ەسەپتەسەك، قازاقستاننىڭ جالپى ىشكى ءونىمى 2014 -جىلدى قوسا ساناساق، 20 ەسەگە، ورتاشا جالاقى 17 ەسەگە ارتقان. 2 ميلليون حالىقتى جۇمىسپەن قامتىدىق. وسى مىنبەردە تۇرىپ، قازاق حالقى مەن قازاقستاندىقتار ءدال قازىرگىدەي جاقسى ءومىر سۇرمەگەنىن ءمالىم ەتە الامىن»، - دەدى ن. نازاربايەۆ.

اۆتور: كەنجەكەي توقتامۇرات قىزى