قازاقستان ءوڭىردىڭ جانە تۇتاس الەمنىڭ ءال-اۋقاتىن قامتاماسىز ەتۋ جايلى سىندارلى يدەيالاردى تالقىلاۋعا ءارقاشان دايىن - ن. نازاربايەۆ
بۇل تۋرالى بۇگىن استانا ەكونوميكالىق فورۋمىنىڭ جالپى وتىرىسىندا قر پرەزيدەنتى نۇرسۇلتان نازاربايەۆ ايتتى.
«قۇرمەتتى استانا ەكونوميكالىق فورۋمىنا قاتىسۋشىلار جانە ءبىزدىڭ ەلىمىزدىڭ قوناقتارى! «قوناقجاي قازاق جەرىنە بۇگىنگى فورۋمعا قاتىسۋ ءۇشىن بارشالارىڭىزدىڭ ۋاقىت ءبولىپ، ءبىزدىڭ ەلدى قۇرمەتتەپ كەلگەندەرىڭىز ءۇشىن شىن جۇرەگىمنەن ريزاشىلىعىمدى بىلدىرەمىن. استانا ەكونوميكالىق فورۋمى سان ءتۇرلى ماسەلەلەردى تالقىلاۋدىڭ جانە ناقتى شەشىمدەر قاراستىرۋدىڭ ماڭىزدى الاڭىنا اينالىپ كەلەدى. بىرىككەن ۇلتتار ۇيىمى، ەكونوميكالىق ىنتىماقتاستىق جانە دامۋ ۇيىمى، دۇنيەجۇزىلىك ساۋدا ۇيىمى سياقتى جاھاندىق، حالىقارالىق ۇيىمدارمەن قاتار دۇنيەجۇزىلىك بانك، ەۋروپالىق قايتا قۇرۋ جانە دامۋ بانكى، ازيا دامۋ بانكى سياقتى حالىقارالىق قارجى ۇيىمدارىنىڭ وكلىدەرى وسى فورۋمنىڭ تۇراقتى قوناقتارى بولىپ كەلەدى»، - دەدى ەلباسى.
ق ر پرەزيدەنتى بيىل فورۋم قاتىسۋشىلارىنىڭ قاتارىن حالىقارالىق ۆاليۋتا قورى، ب و ا و ەكونوميكالىق فورۋمى سياقتى ۇيىمدار مەن الەمگە تانىمال باسىلىمدار تولىقتىرا تۇسكەنىن باسا ايتتى. فورۋم جۇمىسىنا الەمگە ايگىلى عالىمدار، نوبەل سىيلىعىنىڭ يەگەرلەرى، سونىمەن بىرگە الەمدىك ينۆەستورلار، امەريكانىڭ، ەۋروپانىڭ، ازيانىڭ ءىرى كورپوراتسيالارىنىڭ وكىلدەرى دە قاتىسىپ جاتقانىن اتاپ ءوتتى.
«قازاقستان ەكونوميكالىق جانە الەۋمەتتىك دامۋ تۋرالى، وڭىردەگى جانە تۇتاس الەمنىڭ ءال- اۋقاتىن قامتاماسىز ەتۋ جايلى سىندارلى يدەيالاردى، كوزقاراستاردى تالقىلاۋعا ءارقاشان دايىن. بيىل ءبىز ىرگەلى تاقىرىپ جاڭا ەكونوميكالىق ناقتى احۋالدى تالقىلايتىن بولامىز. جاڭا ناقتى احۋالدىڭ قانداي بولارى بىزگە جانە ءبىزدىڭ قازىرگى تاڭدا جاسايتىن تاڭداۋلارىمىز بەن ارەكەتتەرىمىزگە بايلانىستى. وسى فورۋمنىڭ اياسىندا بۇل كۇندەرى مەن دۇنيەجۇزىنىڭ كوپتەگەن عالىمدارىمەن جانە ساياساتكەرلەرىمەن، ەكونوميستەرىمەن كەزدەستىم. قازاقستانداعى بولىپ جاتقان جاعدايدى، ءبىزدىڭ ۇستانىمدى شارالارىمىزدى قالاي باعالايتىندىعىن، قانداي كەڭەس بەرەتىندىگىن بولىستىك. ول ءبىز ءۇشىن وتە ماڭىزدى ءارى پايدالى زاتتار ەدى. ول ءۇشىن دە ريزاشىلىعىمدى بىلدىرەمىن»، - دەدى ن. نازاربايەۆ.
اۆتور: مارلان جيەمباي
