بۇلت ۇستىندە ءدام تاتىڭىز
ەندەشە ارمانىڭىزدى ورىنداۋعا بولادى. جاپونيانىڭ حوككايدو ارالىنا بارىپ، ۋنكاي تەراسساسىنا جەتسەڭىز بولدى، قيال الەمىنە شىنايى ساياحات جاساپ قايتاسىز. ال مۇنىڭ سىرى نەدە؟
بۇل فانتاستيكالىق مەكەنگە قۇمارتۋشىلار سانى كوپ. الەم حالىقتارىنىڭ كوپشىلىگى وسى مەكەنگە تۋرسيتىك ساپار جوسپارلاعاندى ءجون كورەدى. سۇلۋلىقتى كورۋ ءوز الدىنا، ءدام تاتىپ، تىنىعىپ قايتۋ تاعى بار. سۇيىكتىڭىزبەن ساياحات جاساپ، بۇلت تەڭىزىنىڭ عاجابىن تاماشالاۋ، ءتىپتى كەرەمەت. ال ۋنكايدىڭ وسىنداي سىرعا تولى قۇپياسىنىڭ بار سىرى مىنادا عانا. جەرگىلىكتى جەردىڭ ىستىق بۇلاق قاينارلارى مەن تاڭ الدىندا تەمپەراتۋرانىڭ اۋىتۋقىنان تاۋ ايماعىندا تومەنگى بيىكتىكتە سۋ بۋلارى تۇزىلەدى. وسىلايشا عاجاپ مەكەن ادام سۇيسىنتەرلىك تىلسىمعا اينالىپ شىعا كەلەدى.
ەرتە زاماننان بەرى ادامدار بۇل قۇبىلىستى بايقاعانىمەن، جول بولماۋى سالدارىنان، عاجايىپتى تاماشالاۋدان باس تارتقان. قازىر زاماننىڭ جاڭعىرۋى بولسا كەرەك، مىقتى ارقان جولدار تاۋ جوتالارىنىڭ بيىك نۇكتەلەرىنە تارتىلىپ، ادامدار نەبارى 20 دوللارمەن كوتەرىلىپ، بۇلت ۇستىندە اس مازىرىننەن ءدام تاتۋعا، وسىنداي عاجايىپتى راحاتتانا سەزىنۋگە ءسوزسىز مۇمكىندىك العان.
ۋنكاي تەرراسساسى جازدىڭ سوڭعى كۇندەرىنە دەيىن ەسىگىن ايقارا اشادى. باستى سەبەپ، ءدال وسى كەزەڭدە «بۇلت ءتۇزىلۋىنىڭ» 40 پايىزدىق مۇمكىندىگى تۋاتىن كورىنەدى. ءبىراق، ءبىر ايتا كەتەرلىگى «بۇلت تولقىنىنىڭ» تۇراقسىزدىعى. كەيدە اتموسفەرالىق قىسىم بولماۋى سالدارىنان، ءبىر شوكىم بۇلت تا پايدا بولمايدى. وندايدا وسى عاجايىپقا كۋا بولۋ ءۇشىن بىرنەشە كۇن تۇراقتاپ قالۋعا ءماجبۇر بولادى.
سۇلۋ كورىنىستىڭ كۋاگەرى بولۋ ءۇشىن تاڭ اتا تاۋعا شىعىپ، ۋنكاي تەرراساسىنا جول تارتقان ءجون. بۇلت تەڭىزىنەن بيىككە كوتەرىلگەندە، تومەندە سۇلۋلىق سىزگە ءسوزسسىز قول بۇلعايدى. كۇن شىعار ءساتتى باقىلاعاندا، تۋريستەر حيداكا مەن توكاتي تاۋلارىنىڭ بۇلت بۇركەگەن قيالي كورىنىسىن سۋرەتكە ءتۇسىرىپ الۋ مۇمكىندىگىنە يە بولادى.
ءبىراق قالىڭ بۇلت تولقىنى پايدا بولعاندا قىسىم سالدارىنان تومەنگى بۇلت جوعارعى بۇلتپەن قوسىلىپ، ۋنكاي تەرراساسى قالىڭ تۇمان قۇرساۋىندا قالىپ قويادى. ىلە - شالا، وسى قۇبىلىستان كەيىن، مولتىلدەپ، كوكتەن تامشىلار توگىلە باستايدى.
دوسجان بالابەك ۇلى
«ايقىن»
