مەملەكەتتىڭ تابىستى دامۋى ءۇشىن «جيناقى» مەملەكەتتىك اپپارات قۇرۋ قاجەت - ت. دوناقوۆ
بۇل تۋرالى بۇگىن استانا ەكونوميكالىق فورۋمى اياسىنداعى كاسىبي مەملەكەتتىك اپپارات تاقىرىبىنداعى سەسسيا جۇمىسىندا ق ر مەملەكەتتىك قىزمەت ىستەرى ءمينيسترى تالعات دوناقوۆ مالىمدەدى.
سوڭعى جىلدارى ەلىمىز مەملەكەتتىك قىزمەت جانە مەملەكەتتىك باسقارۋ سالاسىندا اۋقىمدى وزگەرىستەردى جۇزەگە اسىرىپ جاتقاندىعىنا توقتالعان مينيستر، قازاقستان پرەزيدەنتى باستاماشىلىق ەتكەن بەس ينستيتۋتسيونالدىق رەفورمالاردى ەلىمىز ىسكە اسىرۋعا كىرىسكەنىن، سونداي- اق وسى رەفورمالاردىڭ اراسىندا ءبىرىنشىسى مەملەكەتتىك اپپاراتتى جاڭعىرتۋعا باعىتالعانى سيمۆولدىق مانگە يە ەكەنىن اتاپ ءوتتى.
«مەملەكەتتى تابىستى دامىتۋدىڭ نەگىزى - ىقشام مەملەكەتتىك اپپارات قۇرۋ. بۇنداي اپپارات ەكونوميكالىق جانە الەۋمەتتىك باعدارلامالاردى ءتيىمدى جۇزەگە اسىرۋدى، سونداي- اق ساپالى مەملەكەتتىك قىزمەتتەردى ۇسىنۋدى قامتاماسىز ەتەدى»، - دەدى ت. دوناقوۆ.
وسى رەتتە ول مەملەكەتتىك قىزمەت ىستەرى مينيسترلىگى مەملەكەتتىك قىزمەتتىڭ جاڭا مودەلىن جۇزەگە اسىرۋدىڭ لوكوموتيۆى، سونىمەن قاتار بارشا مەماپپاراتتى كاسىبيلەندىرۋدىڭ ورتالىعى مەن تەتىگى بولۋى ءتيىس ەكەنىن اتاپ ءوتتى.
«ءتۇزىلىپ وتىرعان مودەل مەملەكەتتىك قىزمەت، مەملەكەتتىك باسقارۋ جانە سىبايلاس جەمقورلىققا جول بەرمەۋ تۇرعىسىندا شەتەلدىك تاجىريبەگە باسا ءمان بەرەدى»، - دەدى مينيستر.
اۆتور: رۋسلان عابباسوۆ
