قازاقتىڭ ۇمىت قالعان ۇلتتىق تاعامدارىنىڭ تانىستىرىلىمى ءوتتى - فوتو
اتالعان شارادا مەيرامحانا اسپازدارى، كوللەدج ستۋدەنتتەرى مەن ۇستازدارى ۇلتتىق تاعامدار ازىرلەپ، كەلگەن قوناقتارعا ءدام تاتقىزدى. ارتىنشا سايىس جەڭىمپازدارىنا ءتۇرلى سىي بەرىلىپ، اسپازدار ۇزدىك دەپ تانىلعان تاعامداردىڭ رەتسەپتىسىمەن ءبولىستى. ءدامى ءتىل ۇيىرگەن تاعامداردىڭ ىشىنەن «ورمە توستىك» كوزگە ءتۇستى. سەبەبى، بۇل اس كۇندەلىكتى تۇرمىستا كوپ ازىرلەنبەيدى.
ەرەكشە ادىسپەن جاسالاتىن بۇل تاعام ناۋرىز مەرەكەسى قارساڭىندا ازىرلەنەدى. تاعام مىندەتتى تۇردە ورىلگەن اش ىشەكتىڭ ىشىنە سالىنادى. ونى دايىنداۋ ءۇشىن بىزگە كەلەسىدەگىدەي ازىق- تۇلىكتەر قاجەت:
- قويدىڭ ءتوسى؛
- قويدىڭ بۇيەنى؛
- اش ىشەك؛
- كوك پياز؛
- سارىمساق؛
- قارا بۇرىش؛
- تۇز.
جاڭا سويىلعان قويدىڭ ءتوسىن الىپ، جاقسىلاپ تۇزدايمىز. ارتىنشا بۇرىش سەبەمىز.
سارىمساقتى مايدالاپ تۋراپ ىشىنە سالامىز.
بىرنەشە كوك پياز سالامىز.
ءتوستى جاقسىلاپ ورايمىز.
ورالعان ءتوستى بۇيەنگە سالىپ، شەتىن جىپپەن تىگەمىز.
اش ىشەكتى بەس ساۋساعىمىزعا وراپ ورەمىز. وسى ورىلگەن ىشەككە بۇيەندەگى تاعامىمىزدى سالامىز.
كاسترولگە سۋىق سۋ قۇيىپ، شامامەن 1,5-2 ساعات ۋاقىت قايناتامىز.
ورمە ءتوستى ىشىنە سالاتىن كوكونىستەرىن الماستىرۋ ارقىلى تۇرلىشە ازىرلەۋگە بولادى. وتاندىق مەيرامحانالاردا ونىڭ ىشىنە كوك پياز بەن سارىمساقتىڭ ورنىنا ءسابىز بەن سارى ورىك سالىپ جاتادى.
تاعامىمىز ءازىر بولعان سوڭ شەتىنە اسكوك پەن كوك پياز قويىپ ارلەيمىز. استارىڭىز ءدامدى بولسىن!
اتالعان سايىستا ءبىرىنشى ورىندى يەلەنگەن اۋەزوۆ اۋدانىنىڭ «الماتى وبلىسى قىزمەت كورسەتۋ جانە تاماقتاندىرۋ سالاسىنداعى يننوۆاتسيالىق تەحنولوگيالار كوللەدجى» 2017 -جىلى استانا قالاسىندا وتەتىن EXPO كورمەسىندە شەتەلدىك قوناقتارعا قازاقتىڭ ۇلتتىق تاعامدارىن ۇسىناتىن بولادى. ەكىنشى ورىندى ءابدراحمانوۆا راتگۇل تۇگەلباي قىزى يەلەنسە، ءۇشىنشى ورىن چۋماكوۆا لاۋراعا بۇيىردى.
Stan.kz
