الماتىدا ايەل كوتەرىپ جۇگىرۋدەن تۇڭعىش چەمپيونات جانجالمەن اياقتالدى
بۇل تۋرالى ك ت ك ارناسى حابارلايدى.
حالىقارالىق وتباسى كۇنىنە ورايلاستىرىلعان بۇل شاراعا رەسمي تۇردە نەكەدە تۇرعان جۇپتار عانا قاتىسا الادى. الايدا بۇل جارىسقا قاتىسقان جۇپتاردىڭ اراسىنان قالا تۇرعىنى ءوز كۇيەۋى مەن وزگە ايەلدىڭ جۇرگەنىن بايقاپ قالعان. وسىلايشا، وتباسىلىق جۇگىرۋ جانجالمەن اياقتالىپ، ەندى كەلىنشەك كۇيەۋىنىڭ جانە جارىس ۇيىمداستىرۋشىلارىنىڭ ۇستىنەن شاعىم تۇسىرمەك.
تاتيانا گولۋبەۆا جاقىندا عانا ايىرىلىسقان كۇيەۋىنىڭ موينىنا اسىلعان ايەل قالايشا جارىسقا قاتىسقانىن انىقتاۋعا كىرىسەدى. ناتيجەسىندە كۇيەۋى جارىسقا وزگە ايەلدى سونىڭ اتىنان قاتىستىرعانىن تۇسىنەدى.
وتباسىلىق قۇندىلىقتاردى دارىپتەيتىن جارىستا وسىلايشا «مۇلدەم وتباسىلىق قۇندىلىقتان جۇرداي» ادامدار قاتىسقانىنا تاتيانا گولۋبەۆا قاتتى اشۋلانعان.
«ارينە، ىزالىمىن. مەنى مورالدىق تۇرعىدان تاپتاپ تاستادى. ال ۇيىمداستىرۋشىلارعا ايتارىم، مۇقيات بولىڭىزدار، بۇل قانشا دەگەنمەن وتباسى كۇنى عوي. سەبەبى، مەنىڭ كۇيەۋىم سەكىلدى ارسىز ادامدار دا بولادى. ول مەنى بۇكىل ەلگە ماسقارا ەتپەك بولدى: ەكەۋىمىز ايىرىلسقاننان كەيىن مەن سەنىڭ ورنىڭدى باساتىن ادام تاپتىم دەگىسى كەلىپ وتىر»، - دەيدى تاتيانا.
بەلگىلى بولعانداي، گولۋبەۆتەر وتباسى ءبىر اي بۇرىن عانا اجىراسقان ەكەن. تاتيانانىڭ بۇرىنعى كۇيەۋى ەندى قالاعان ايەلدى موينىنا وتىرعىزۋعا قۇقىلى. دەگەنمەن ايەلگە بۇل ەمەس، بۇرىنعى كۇيەۋى جاڭا عاشىعىن ونىڭ اتىنان قاتىستىرعانى اۋىر تيگەن ەكەن.
«ول مەنىڭ ورنىما ايەلى رەتىندە سول ايەلدى بۇكىل ەلدىڭ الدىنا شىعاردى. بۇل جالعان. ول مەنىڭ جەكە قۇجاتتارىمدى پايدالانىپ، ۇيالماي وتىرىك ايتتى» - دەيدى گولۋبەۆا.
ال ۆلاديسلاۆ گولۋبەۆ بولسا، وزگە ايەلدى ارقالاپ جۇرگەنىن جاسىرمادى.
«ءبىز كۋالىكتى كورسەتتىك، ءبىراق ولاردا ونى مۇقيات تەكسەرىپ وتىراتىن ۋاقىت بولمادى. ۇيىمداستىرۋشىلاردىڭ ەش كىناسى جوق. قاتىسامىن دەپ قۇلشىنىس بىلدىرگەن ءوزىم بولاتىنمىن. ال ايەلىمدى رەنجىتۋ ويىمدا بولعان ەمەس. ءبىزدىڭ ەكى بولەك كەتكەنىمىزگە ءبىر جارىم جىل بولدى. رەسمي تۇردە اجىراسقانىمىزعا ءبىر ايداي ۋاقىت ءوتتى. سول سەبەپتى، ءوزىم قالاعان ايەلمەن جۇگىرۋگە قۇقىم بار دەپ ويلايمىن»، - دەيدى ۆلاديسلاۆ گولۋبەۆ.
تاتيانا بولسا، بۇل كوكتەمگى مارافوندى توقتاتىپ، كۇيەۋىن سوتتا جاۋاپقا تارتپاق نيەتتە.
