جەر رەفورماسى جونىندەگى كوميسسيا الەۋمەتتىك جەلىدە پاراقشالار اشادى - م. ابەنوۆ

استانا. قازاقپارات - جەر رەفورماسى جونىندەگى كوميسسيا الەۋمەتتىك جەلىدە پاراقشالار اشادى. بۇل تۋرالى جەر رەفورماسى جونىندەگى رەسپۋبليكالىق كوميسسيانىڭ قۇقىقتىق جانە اقپاراتتىق- ءتۇسىندىرۋ باعىتىنداعى جۇمىس توبىنىڭ العاشقى وتىرىسىندا اقپاراتتىق- ءتۇسىندىرۋ توبىنىڭ جەتەكشىسى مۇرات ابەنوۆ ءمالىم ەتتى.

«كوميسسيا جۇمىسىنىڭ كەرى بايلانىس ماسەلەسىنە كەلسەك، قازاقستاننىڭ ءاربىر ازاماتى ءبىزدىڭ جۇمىسىمىزدىڭ اشىقتىعىن ءبىلۋى كەرەك. ولاردىڭ وتىنىشتەرىن قارايتىن جولدار بولۋى كەرەك، ياعني جازباشا وتىنىشتەر قابىلداۋدى، ينتەرنەت ارقىلى، بۇقارالىق اقپارات قۇرالدارى ارقىلى ۇيىمداستىرۋعا ءتيىسپىز. ءبىز وسى جۇمىستاردى دا ۇيلەستىرەتىن بولامىز»، - دەدى م. ابەنوۆ.

ونىڭ ايتۋىنشا، كوميسسيانىڭ الەۋمەتتىك جەلىدە اشىلاتىن ارنايى پاراقشاسىنا كەلىپ تۇسەتىن بارلىق اقپاراتتار تالدانىپ، ساراپتالىپ ولار الداعى جۇمىس بارىسىندا پايدالانىلۋى مۇمكىن.

«جالپى، ايتا كەتەرلىگى كوميسسيانىڭ وزىندە قازىرگى كەزدە جەكە مەنشىكتە تۇرعان جەرلەردىڭ يەلەنۋ زاڭدىلىعى ماسەلەلەرى بويىنشا اقپاراتتار دا جەتكىلىكسىز، جەكە مەنشىككە ساتىلعان نەمەسە جالعا بەرىلگەن جەرلەردىڭ ءتيىمدى پايدالانىلۋىنا قاتىستى اقپاراتتار دا جوق. سوندىقتان دا، اقپاراتتىق- ءتۇسىندىرۋ توبى وسى ماسەلەلەرمەن دە اينالىساتىن بولادى»، - دەدى م. ابەنوۆ.

اۆتور: قانات مامەتقازى ۇلى