حالىقارالىق قىلمىسكەر اتانعان قازاقستاندىق حاكەر قىزعا شەتەلدىك عالىمدار اراشا ءتۇستى

استانا. قازاقپارات - حالىقارالىق قىلمىسكەر دەپ تانىلعان قازاقستاندىق حاكەر قىزعا شەتەلدىك عالىمدار اراشا ءتۇستى.

ولار بويجەتكەندى قورعاۋ ءۇشىن ون التى تىلدە اشىق حات جازعان دەپ حابارلايدى NUR. KZ پورتالى.

«قازاقستاندا تۋىلعان كومپيۋتەرلىك ينجەنەر الەكساندرا ەلباكيان بۇگىندە اۆتورلىق قۇقىقتى بۇزعان حالىقارالىق قىلمىسكەر دەپ تانىلدى. ونىڭ Sci-Hub اتتى سايتى ميلليونداعان عىلىمي جۇمىستاردى الەم حالقىنا قولجەتىمدى ەتىپ، امەريكالىق بەلدى باسىلىمعا تىكەلەي شايقاس اشتى»، - دەپ جازعان worldcrunch سايتى.

رەسمي مالىمەتتەرگە سايكەس، 27 جاستاعى الەكساندرا الماتىدا تۇرادى. ءبىراق شەتەلدىك سايتتىڭ ايتۋىنشا، ول شىن مانىسىندە رەسەيدە جاسىرىنىپ جۇرگەن كورىنەدى. ونىڭ ءومىرى مەن ءار ساپارى بۇگىندە قاتاڭ قۇپيادا ساقتالىپ وتىر ەكەن.

2015-جىلدىڭ قازانىندا نيۋ-يورك سوتى ونى پيراتتىق سايت جاساعانى ءۇشىن كىنالى دەپ تاپقان.

2011-جىلى الەكساندرا ەلباكيان اۆتورلىق قۇقىعى قورعالعان 50 ميلليون ماقالانى قامتيتىن ينتەراكتيۆتى دەرەكتەر بازاسىن قۇرعان. وسى بازادان بۇكىل الەمدەگى ينتەرنەت پايدالانۋشىلار ماقالالاردىڭ كەز-كەلگەنىن ەركىن كوشىرىپ الا الادى. بۇرىن بۇل ماقالالاردىڭ ءاربىرى قىرۋار اقشاعا ساتىلاتىن، ولاردىڭ قۇنى 35 دوللاردان باستالىپ، 500 دوللارعا دەيىن جەتكەن.

قازاقستاندىق بويجەتكەن بۇگىندە جاعدايى كوڭىل كونشىتەرلىك ەمەس ەكەنىن جاسىرمايدى.

«مەن وزىمە قازىرگى جۇرگەن جەرىمدە قاۋىپ ءتونىپ تۇر دەپ ويلامايمىن. ءبىراق اباي بولۋىم كەرەك»، - دەيدى الەكساندرا Le Monde باسىلىمىنا تەلەفون ارقىلى بەرگەن سۇحباتىندا. ول بۇگىندە ا ق ش- قا نەمەسە وزگە ەلگە عىلىمي كونفەرەنتسياعا مۇلدەم بارۋدان قالعان.

2015-جىلدىڭ جازىندا ول نيۋ-يورك سوتىنان وزىنە قورعان بولۋىن جانە ارەكەتىن زاڭدى دەپ تابۋىن سۇراپ، ءوتىنىش جازعان.

ال سول ارادا، بويجەتكەننىڭ عىلىمي جۇمىستاردى تەگىن ەتەتىن سايت اشقانىن الەم بويىنشا عالىمدار قۋانا پايدالانىپ ءجۇر. ولار، ءتىپتى عىلىمي جۇمىستارىن جازۋ كەزىندە الەكساندرانىڭ Sci-Hub سايتىنا دەرەككوز رەتىندە سىلتەمە جاساۋدا.

حورۆاتيادا تۇراتىن عالىم مارسەل مارس - ءوزىنىڭ عىلىمي زەرتەۋىنە اتالمىش سايتتىڭ زور كومەك تيگىزگەنىن العا تارتىپ، قازاقستاندىق حاكەردى قورعاۋ ءۇشىن ون التى تىلدە اشىق حات جازعانداردىڭ ءبىرى.

ال بەرليندە تۇراتىن وزگە عالىم، پروفەسسور ۋلريح ديرناگل «قازاقستاندىق پيراتقا اشىق ماراپات جاسالۋ كەرەك» دەپ سانايدى.

«رەسەيدە جۇرگەن بۇل بويجەتكەن ناعىز كەرەمەت جان»، - دەيدى ول. پروفەسسور بۇدان بىلاي بارلىق عىلىمي جۇمىستاردى تەگىن ەتۋدى ۇسىنۋدا.