ن. نازاربايەۆتىڭ مەكتەپ بىتىرگەندە سىنىپتاستارىمەن بىرگە تۇسكەن فوتوسۋرەتى جاريالاندى
بۇگىن ەلىمىزدەگى مەكتەپتەردە سوڭعى قوڭىراۋ ءۇنى سىڭعىرلاپ، جاسوسپىرىمدەر التىن ۇياسىمەن قوشتاسۋدا. وسىعان وراي، الپىس جىلعا جۋىق ۋاقىت بۇرىنعى كەزەڭگە ويشا شەگىنىس جاساپ، نۇرسۇلتان ءابىش ۇلى نازاربايەۆتىڭ وقۋشى كەزىنەن ەستەلىك - 1958-جىلعى فوتوسۋرەتتى ۇسىنىپ وتىرمىز.
بۇل - اباي اتىنداعى مەكتەپ-ينتەرناتتىڭ 21- تۇلەكتەرىنىڭ سۋرەتى. وقۋ ءىسىنىڭ مەڭگەرۋشىسى سەيىتحان يسايەۆتىڭ وڭ جاعىنداعى بوزبالا - نۇرسۇلتان ءابىش ۇلى.
وقۋشى نۇرسۇلتان تۋرالى ونىڭ ۇستازى مەن سىنىپتاستارى تومەندەگىدەي سىر شەرتەدى:
سەيىتحان يسايەۆ، ن. ءا. نازاربايەۆتىڭ ۇستازى:
- ول كەزدە بۇكىل وقۋ پروتسەسى، سىنىپتان تىس جۇمىستاردىڭ ءبارى وقۋ ءىسىنىڭ مەڭگەرۋشىسىنە جۇكتەلەتىن. وزىمە قيىن بولعاندىقتان، ماعان پيونەر ۇيىمى مەن كومسومول ۇيىمىنىڭ مۇشەلەرى كومەكتەسەتىن. ال ول ۇيىمداردى ءوزىن تىڭداتا الاتىن، ايتقانىن ورىنداتا الاتىن شاكىرت باسقاراتىن. سونداي شاكىرت نۇرسۇلتان ءابىش ۇلى بولدى.
كەڭەس بايبوسىنوۆ، ن. ءا. نازاربايەۆتىڭ سىنىپتاسى:
- ەمتيحان كەزىندە نۇرسۇلتاننان كوشىردىك. جاسىراتىن نەسى بار؟ بىزدە ول كەزدە بارلىق ساباقتاردان ەمتيحان بولاتىن. سول كەزدە كومەكتەسەتىن. ءوزىم شىعارا الماعان ەسەپتى، نۇرەكەڭ شىعارسا، نەگە كوشىرمەيمىن؟ كوشىرەمىن!
سايلاۋبەك قىدىراليەۆ، سىنىپتاسى:
- دەمالىس كۇندەرى ءبي كەشتەرىنەن قالمايتىنبىز. نۇرسۇلتان تاماشا بيلەيتىن. ول كەزدە كىم جاقسى وقيدى، قىزدار سوعان قاراي جۇگىرەتىن ەدى عوي. ال نۇرەكەڭ مەكتەپتى «التىن مەدالمەن» بىتىرەمىن دەپ، ساباقتان باس الماي وتىراتىن. وقۋعا زەرەك، بايان، دومبىرا تارتاتىن نۇرسۇلتان نازاربايەۆقا قىزداردىڭ كوبى عاشىق بولدى.
رايا عاريف قىزى، سىنىپتاسى:
- سول مەكتەپتە وقىپ جۇرگەن كەزدەردە-اق نۇرسۇلتاننىڭ كوشباسشىلىق قاسيەتتەرى ەرەكشەلەنىپ تۇراتىن.
