12:59, 25 - مامىر 2016 | GMT +5
رەسەي جالاقى كولەمى بويىنشا قازاقستانمەن تەڭەستى
استانا. قازاقپارات - رەسەي جالاقى كولەمى بويىنشا قازاقستانمەن تەڭەستى.
رەسەيلىكتەردىڭ 2015-جىلعى ورتاشا ايلىعى ا ق ش دوللارىمەن ەسەپتەگەندە قازاقستانداعى ەڭبەكاقىمەن تەڭەستى، دەپ حابارلادى ر ب ك.
ماسكەۋدەگى جوعارعى ەكونوميكا مەكتەبى دەرەگىنشە، رەسەيدە جالاقى كولەمىنىڭ قۇلدىراۋى ناتيجەسىندە، وتكەن جىلدىڭ سوڭىندا ەڭبەكاقى بەلورۋسسيا مەن قازاقستانداعى كورسەتكىشكە تومەندەگەن.
ۆاليۋتانىڭ ايىرباس باعامىنا بايلانعان جالاقى كولەمى كورشى ەلدە وتكەن جىلى 558 دوللار اۋماعىندا بولعان. بۇل 2014-جىلمەن سالىستىرعاندا 34 پايىزعا تومەن. ءدال وسى كەزەڭدە قازاقستان مەن بەلورۋسسيادا ايلىق 549 جانە 415 دوللار كولەمىندە شىققان.
وتكەن اپتادا رەسەيدىڭ سبەربانكى ورتاشا ايلىقتىڭ قىتاي، پولشا، سەربيا جانە رۋمىنيا ەلدەرىندەگى دەڭگەيدەن دە تومەندەي تۇسكەنىن حابارلاعان.
