قىتاي سۋداندا العاشقى اتومدىق رەاكتوردى سالادى

استانا. قازاقپارات - قىتايدىڭ مەملەكەتتىك يادرولىق بىرلەستىگى (China National Nuclear Corp, CNNC) سۋدان رەسپۋبليكاسىنىڭ سۋ رەسۋرستارى جانە ەلەكترلەندىرۋ مينيسترلىگىمەن قۋاتتىلىعى 600 مەگاۆاتت اتوم رەاكتورىنىڭ قۇرىلىسى تۋرالى ەكى كەلىسىمگە قول قويدى.

China Daily باسىلىمىنىڭ جازۋىنشا، تاراپتار كەلىسىمشارتتىڭ قۇنى جانە رەاكتوردىڭ ءتيپى، سونداي-اق ونى تاپسىرىس بەرۋشىگە تاپسىرۋ مەرزىمدەرى تۋرالى اقپارات بەرمەيدى. ساراپشىلار بۇل قىتايدا ازىرلەنگەن ءۇشىنشى بۋىننىڭ Hualong One رەاكتورى بولاتىنىن شامالاپ وتىر.

CNNC باسشىسى سۋن سيننىڭ بۇعان دەيىن مالىمدەۋىنشە، قىتايلىق بىرلەستىك 2030-جىلعا قاراي الەمنىڭ ءتۇرلى ەلدەرىندە ««جىبەك جولىنىڭ» ەكونوميكالىق بەلدەۋى» ستراتەگياسىنىڭ اياسىندا 30 اتوم ەنەرگيالىق بلوگىن سالۋدى جوسپارلاپ وتىر. ونىڭ ايتۋىنشا، CNNC ارگەنتينا، برازيليا، مىسىر،  ۇلى بريتانيا، فرانسيا جانە يوردانيا سياقتى ەلدەرمەن ىنتىماقتاستىق تۋرالى كەلىسىمدەرگە قول قويدى.