ىستامبۇلدا دۇنيەجۇزىلىك گۋمانيتارلىق سامميت ءوتتى

استانا. قازاقپارات - 23-24- مامىر كۇندەرى ىستامبۇلدا بىرىككەن ۇلتتار ۇيىمىنىڭ باستاماسىمەن «ءبىرتۇتاس ادامزات - جالپى جاۋاپكەرشىلىك» تاقىرىبىمەن دۇنيەجۇزىلىك گۋمانيتارلىق سامميت بولىپ ءوتتى، دەپ حابارلادى قازاقستاننىڭ تۇركياداعى ەلشىلىگىنىڭ باسپا ءسوز قىزمەتىنەن.

العاش رەت ۇيىمداستىرىلعان شارادا 60 قا جۋىق مەملەكەت باسشىسى، حالىقارالىق جانە ۇكىمەتتىك ەمەس ۇيىمدار، گۋمانيتارلىق قۇرىلىمداردىڭ وكىلدەرى، بيزنەسمەندەر، داعدارىسقا ۇشىراعان حالىق وكىلدەرى قاتىستى.

سامميتكە گ ف ر كانتسلەرى ا. مەركەل، ازەربايجان پرەزيدەنتى ي. اليەۆ، ۋكراينا پرەزيدەنتى پ. پوروشەنكو، قىرعىزستان پرەزيدەنتى ا. اتامبايەۆ، گرۋزيا پرەزيدەنتى گ. مارگۆەلاشۆيلي، بولگاريا پرەمەر - ءمينيسترى ب. بوريسوۆ، گرەكيا پرەمەر- ءمينيسترى ا. تسيپراس، نيدەرلاندى پرەمەر-ءمينيسترى م. ريۋتتە، فينليانديا پرەمەر-ءمينيسترى يۋ. سيپيليا، ليۆان پرەمەر-ءمينيسترى تاممام سالام، كۋۆەيت ءامىرى ساباح ءال-احمەد اس-ساباح، سونداي-اق ءبىرقاتار افريكالىق مەملەكەتتەردىڭ كوشباسشىلارى قاتىستى.

ب ۇ ۇ باس حاتشىسى پان گي مۋن سامميتتىڭ جۇمىسىن قازىرگى كەزدە بوسقىنداردىڭ سانى ەكىنشى دۇنيەجۇزىلىك سوعىس كورسەتكىشتەرىنە جەتكەنى تۋرالى سوزدەرمەن اشتى.

قازاقستاندىق تاراپتىڭ اتىنان سىرتقى ىستەر ءمينيسترىنىڭ ورىنباسارى مۇحتار تىلەۋبەردى قاتىستى.