ادىلبەك نيازىمبەتوۆ اقتاۋلىق جاستاردى سالاۋاتتى ءومىر سالتىن ۇستاۋعا شاقىردى
«اقجەلكەن» اۋلا كلۋبىنىڭ ۇيىمداستىرۋشى-پەداگوگى امانگۇل جىلگەلديەۆانىڭ ايتۋىنشا، بۇگىندە بالالاردىڭ ءتۇرلى ۇيىرمەلەرگە قاتىسىپ، ۇناعان سپورت تۇرلەرىمەن اينالىسۋلارىنا بارلىق جاعداي جاسالعان. سونداي-اق، ءتۇرلى دەڭگەيدە ءداستۇرلى تۇردە كوپتەگەن مادەني-بۇقارالىق جانە سپورتتىق ءىس-شارالار وتكىزىلىپ كەلەدى. بولاشاعىنان زور ءۇمىت كۇتتىرەتىن سپورتشىلار دا از ەمەس.
«ءبىزدىڭ كلۋبتا كاراتە، تاەكۆوندو، كيكبوكسينگ، سونداي-اق تۋريزم جانە جاس فيزيك ۇيىرمەسى جۇمىس جاسايدى. كلۋبقا تۇراقتى كەلىپ سپورتپەن اينالىسىپ جۇرگەندەر سانى 400 گە جۋىق. اسىرەسە، قۋانعالي داستان ۇلى، ساعىندىق ساريەۆ، ساۋىربەك جاڭابايەۆ، بالنۇر ورىنباساروۆا جانە ەرمەك اسانوۆ سياقتى قىزمەتكەرلەردىڭ ەڭبەگى جوعارى. ولار ءبىلىم سالاسىنىڭ دامۋىنا جانە وسكەلەڭ ۇرپاقتى تاربيەلەۋدە ۇلكەن جۇمىستار اتقارىپ ءجۇر»، - دەدى ول.
باس قوسۋدا ءسوز العان ادىلبەك نيازىمبەتوۆ پەن بەرىك ابدراحمانوۆ، جاستارمەن وسىنداي تۇراقتى كەزدەسۋلەر وتكىزىپ تۇرۋعا قارسى ەمەستىگىن ايتا كەلە، وزدەرىنىڭ سپورتتا جەتكەن جەتىستىكتەرى مەن جەكە ءومىرى تۋرالى بايانداپ بەردى.
بارلىق سۇراقتارعا تۇشىمدى جاۋاپ بەرگەن بىلعارى قولعاپ شەبەرلەرى، جاستارعا ومىردە دۇرىس تاڭداۋ جاساۋعا، سالاۋاتتى ءومىر سالتىن ۇستانۋعا شاقىرىپ، الداعى برازيليا استاناسى ريو دە جانەيرودا اتوي سالۋعا بارىنشا جۇدىرىقتاساتىندارىن ايتتى.
