وبلىس اكىمى قىرىمبەك كوشەربايەۆ يليا يليندى تۋعان كۇنىمەن قۇتتىقتادى - فوتو

قىزىلوردا. قازاقپارات - بۇگىن قىزىلوردا وبلىسىنىڭ اكىمى قىرىمبەك كوشەربايەۆ ەكى دۇركىن وليمپيادا جانە ءتورت دۇركىن الەم چەمپيونى يليا ءيليندى جاتتىعۋ زالىنا بارىپ، تۋعان كۇنىمەن قۇتتىقتادى.

بۇل تۋرالى اكىمدىكتىڭ باسپا ءسوز قىزمەتى حابارلادى.

ايماق باسشىسى قىرىمبەك ەلەۋ ۇلى يلياعا جىلى لەبىزىن جەتكىزىپ، سىي- سياپاتىن كورسەتتى. ريو- دە- جانەيرودا وتەتىن وليمپياداعا دايىندىعىن سۇراپ، جەڭىسكە جەتۋىنە تىلەكتەس ەكەنىن ايتتى.

«يليا، مەن سەنى بۇكىل سىر جۇرتشىلىعىنىڭ اتىنان تۋعان كۇنىڭمەن شىن جۇرەكتەن قۇتتىقتايمىن. ءبىز سەنىمەن، سەنىڭ جەتىستىكتەرىڭمەن ماقتانامىز. الداعى ۋاقىتتا دا سەنەن تەك جەڭىس كۇتەمىز. ساعان ءارقاشان قولداۋ كورسەتۋگە دايىنبىز»، - دەدى وبلىس اكىمى قىرىمبەك كوشەربايەۆ.

«مەنىڭ قۋانىشىمدى ءبولىسىپ، ارنايى جاتتىعۋ زالىنا كەلگەندەرىڭىز ءۇشىن ريزاشىلىعىمدى بىلدىرەمىن. ءقازىر ءبىز قىزۋ جاتتىعۋ ۇستىندەمىز. ءار جارىستىڭ الدىندا مەن ءوزىمنىڭ تۋعان جەرىم  قىزىلورداعا كەلىپ، وسى زالدا جاتتىعۋ جاسايمىن. ەڭ العاش ۇلكەن سپورتقا قادام جاساعان جەرىم بولعاندىقتان، بۇل مەن ءۇشىن وتە ماڭىزدى. مەن ءتورت جىلدىقتىڭ باستى باسەكەسىندە جەڭىسكە جەتىپ، كوك تۋىمىزدى جەلبىرەتۋگە ۋادە بەرەمىن»، - دەدى يليا يلين.

 

 اۆتور: ەلۋباي اۋەزوۆ